തിരുവനന്തപുരം : യുവതി ആത്മഹത്യചെയ്ത സംഭവത്തില് ഭര്ത്താവിനെ പോലീസ് അറസ്റ്റുചെയ്തു. വട്ടപ്പാറ പ്രശാന്ത് നഗറില് ആര്യാ ഭവനില് ആര്യാ ദേവനെ (23) വീടിനുള്ളില് മരിച്ചനിലയില് കണ്ടെത്തിയതിനെത്തുടര്ന്ന് നടത്തിയ അന്വേഷണത്തിലാണ് ഭര്ത്താവായ തിരുവല്ലം പാച്ചല്ലൂര് കുമിളി ലെയിനില് വത്സലാ ഭവനില് പ്രദീപ് (രാജേഷ് കുമാര്-32) നെ പോലീസ് അറസ്റ്റുചെയ്തത്.
ബുധനാഴ്ച രാത്രി 11 മണിയോടെ ഒരു വയസ്സു പ്രായമുള്ള യുവതിയുടെ ഇരട്ടക്കുട്ടികളുടെ കരച്ചില് കേട്ട് അമ്മയും സഹോദരിയും വാതിലില് തട്ടി വിളിച്ചെങ്കിലും തുറക്കാതെ വന്നതോടെ വാതില് പൊളിച്ച് നോക്കുമ്പോഴാണ് ബോധരഹിതയായ നിലയില് ആര്യയെ കാണുന്നത്. ഉടന് ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. വിഷം ഉള്ളില് ചെന്ന് മരിച്ചെന്നാണ് പോസ്റ്റ്മോര്ട്ടം റിപ്പോര്ട്ട്.
ആര്യയെ വിവാഹം കഴിക്കുമ്പോള് രാജേഷിന് മറ്റൊരു ഭാര്യയും മക്കളുമുണ്ടായിരുന്നു. അതിന്റെ പേരില് ഇരുവരും നിത്യവും വഴക്കായിരുന്നു. തുടര്ന്ന് രാജേഷുമായി പിണക്കത്തിലായ ആര്യ ഒന്പത് മാസമായി അച്ഛനോടൊപ്പമാണ് കഴിഞ്ഞിരുന്നത്. എന്നാല് ആഴ്ചകള്ക്കു മുന്പ് രാജേഷ് രാത്രിയില് ആര്യയുടെ വീട്ടിലെത്തി പണം ആവശ്യപ്പെട്ടു ബഹളം വെച്ചതായി യുവതിയുടെ ബന്ധുക്കള് പറയുന്നു. നിരന്തരം ഫോണില്കൂടി പണം ചോദിച്ചിരുന്നതായും ബന്ധുക്കള് പറയുന്നു. സ്ത്രീധന പീഡനം, ആത്മഹത്യാ പ്രേരണ, ഒരു സ്ത്രീയുമായി നിയമപരമായി ബന്ധം നിലനില്ക്കെ മറ്റൊരു സ്ത്രീയെ വിവാഹം കഴിച്ചു എന്നീ വകുപ്പുകള് ചുമത്തിയാണ് ഇയാളെ അറസ്റ്റ് ചെയ്തിരിക്കുന്നത്.
ആറ്റിങ്ങള് ഡിവൈ.എസ്.പി എസ്.വൈ. സുരേഷിന്റെ നേതൃത്വത്തില് വട്ടപ്പാറ സി.ഐ ടി.ബിനുകുമാര്, എസ്.ഐമാരായ സലില്, ബാബു സാബത്ത്, എ.എസ്.ഐ ഷാ, സിവില് പോലീസ് ഓഫീസര്മാരായ ഷമീര്, രാജീവ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
