തിരുവനന്തപുരം : തിരുവിതാംകൂര് ദേവസ്വം ബോര്ഡിന് കീഴിലുള്ള ക്ഷേത്രങ്ങളില് ഇത്തവണ കര്ക്കിടക വാവ് പ്രമാണിച്ചുള്ള ബലിതര്പ്പണം അനുവദിക്കേണ്ടതില്ലെന്ന് ബോര്ഡ് യോഗം തീരുമാനിച്ചു. അടുത്തമാസം 20നാണ് കര്ക്കടക വാവ്. കര്ക്കിടക വാവിനോടനുബന്ധിച്ച് തിരുവിതാംകൂര് ദേവസ്വം ബോര്ഡിലെ ചെറുതും വലുതുമായ നിരവധി ക്ഷേത്രങ്ങളില് ഭക്തര്ക്ക് ബലിതര്പ്പണത്തിനുള്ള സൗകര്യം എല്ലാവര്ഷവും ഉണ്ടാകാറുണ്ട്.
ബലിതര്പ്പണത്തിനായി പല ക്ഷേത്രങ്ങളിലും വന് ഭക്തജനത്തിരക്കാണ് അനുഭവപ്പെടുക. സംസ്ഥാനത്തും രാജ്യത്തിന്റെ ഇതരഭാഗത്തും കൊവിഡിന്റെ വ്യാപനം നാള്ക്കുനാള് വര്ദ്ധിച്ചുവരുന്ന സാഹചര്യത്തില് സാമൂഹിക അകലം പാലിക്കേണ്ടതായുണ്ട്. ബലിതര്പ്പണ ചടങ്ങില് സാമൂഹ്യ അകലം പാലിക്കുക എന്നത് പ്രയാസമേറിയ കാര്യമാണ്.
മാത്രമല്ല ബലിതര്പ്പണ ചടങ്ങിന്റെ ഭാഗമായി ഭക്തജനങ്ങള് തര്പ്പണത്തിന് മുമ്പും ശേഷവും കൂട്ടായി വെള്ളത്തില് ഇറങ്ങുന്ന പതിവും ഉണ്ട്. നിലവിലെ സാഹചര്യത്തില് ഒഴിവാക്കേണ്ടതായതിനാലാണ് ബലിതര്പ്പണം അനുവദിക്കേണ്ടതില്ലെന്ന് ബോര്ഡ് യോഗം തീരുമാനിച്ചതെന്ന് ദേവസ്വം ബോര്ഡ് പ്രസിഡന്റ് അറിയിച്ചു.
