ന്യൂഡല്ഹി അതിര്ത്തി സംഘര്ഷത്തില് കേന്ദ്രസര്ക്കാരിനെതിരെ കോണ്ഗ്രസ് പ്രവര്ത്തകസമിതി പ്രമേയം പാസാക്കി. ചൈനയുടെ കടന്നുകയറ്റം ഉണ്ടായിട്ടും കേന്ദ്രം എന്ത് നടപടിയാണ് സ്വീകരിച്ചതെന്ന് കോണ്ഗ്രസ്. ആരും കടന്നുകയറിയിട്ടില്ലെന്ന് പ്രധാനമന്ത്രി പറഞ്ഞതെന്തു കൊണ്ടാണ്. പിന്നീട് വിശദീകരണവുമായി വന്നതിന് എന്താണ് കാരണമെന്ന് പ്രമേയത്തിലൂടെ ചോദ്യം ഉന്നയിച്ച് കോണ്ഗ്രസ്.
പ്രധാനമന്ത്രി സേനയെ ചതിക്കുകയായിരുന്നുവെന്ന് രാഹുല് ഗാന്ധി പ്രവര്ത്തക സമിതിയില് പറഞ്ഞു. രാജ്യം നേരിടുന്ന പ്രതിസന്ധികള്ക്ക് പ്രധാന കാരണം ബിജെപി സര്ക്കാരിന്റെ തെറ്റായ നയങ്ങളാണെന്ന് സോണിയ ഗാന്ധി. സര്ക്കാരിന്റെ നയതന്ത്ര ചര്ച്ചകള് പരാജയമായതിന്റെ ഫലമായി രാജ്യ സുരക്ഷയും ഭൂപ്രദേശ സമഗ്രതയും പ്രതിസന്ധിയിലാണ്. കോവിഡ് പ്രതിസന്ധി കൈകാര്യം ചെയ്യുന്നതിലും സര്ക്കാര് പരാജയപ്പെട്ടു.
ഇന്ധന വില വര്ധിപ്പിക്കുന്നത് സര്ക്കാരിന്റെ ദയാരഹിത നടപടിയാണെന്നും കോണ്ഗ്രസ് പ്രവര്ത്തക സമിതി യോഗത്തില് സോണിയ ഗാന്ധി കുറ്റപ്പെടുത്തി. അതിര്ത്തിയിലെ പ്രതിസന്ധിക്ക് സമയബന്ധിതമായി പരിഹാരം കണ്ടില്ലെങ്കില് ഗുരുതര സ്ഥിതിയിലേക്ക് പോകുമെന്ന് മുന് പ്രധാനമന്ത്രി ഡോ. മന്മോഹന് സിങ്ങും പ്രവര്ത്തക സമിതി യോഗത്തില് മുന്നറിയിപ്പ് നല്കി.
