പത്തനംതിട്ട : കൊറോണ കാരണം വീടിന്റെ അകത്തളങ്ങളിൽ ഏറെ ഒതുക്കപ്പെട്ടുപോയ ഒരു വിഭാഗമാണ് വയോജനങ്ങൾ. പഴയകാല നന്മകളും ഓർമ്മകളുംകൊണ്ട് നമ്മുടെ മനസ്സിൽ ഗൃഹതുരതയുടെ പൂക്കാലം തീർക്കുന്ന ഈ വയോജനങ്ങളെ ഒന്നായി ചേർത്തു നിർത്തി അവർക്ക് സന്തോഷത്തിന്റെ, ഐശ്വര്യത്തിന്റെ, നന്മകളുടെ, രുചി ഭേദങ്ങളുടെ, ഉല്ലാസത്തിന്റെ ഒരു ദിനം ഒരുക്കാൻ പത്തനംതിട്ട നഗരസഭയിലെ വാർഡ് 16 ലെ വയോമിത്രം പദ്ധതിയിലെ വയോജനങ്ങൾക്കായി ഓണാഘോഷവും വിഭവ സമൃദ്ധമായ ഓണസദ്യയും ഒരുക്കി.
മുതിർന്നവർ തങ്ങളുടെ തൊടിയിലേയും മുറ്റത്തേയും പൂക്കളിറുത്ത് അത്തപൂക്കളമൊരുക്കി. തുടര്ന്ന് വിവിധ കലാകായിക മത്സരങ്ങൾ നടത്തുകയും വിജയികൾക്ക് സമ്മാനങ്ങളും നല്കി. വള്ളപ്പാട്ടും കുരവയുമൊക്കെയായി പഴയ ഓർമയിലേക്ക് അവരെത്തി. ഓണാഘോഷ പരിപാടി നഗരസഭ ഹെൽത്ത് സ്റ്റാൻഡിങ് കമ്മിറ്റി ചെയർമാൻ ജെറി അലക്സ് ഉദ്ഘാടനം ചെയ്തു. വയോമിത്രം മെഡിക്കൽ ഓഫീസർ ഡോ.റിതു റെയ്ച്ചൽ ജോർജ്ജ് ഓണസന്ദേശം നല്കി. വയോജനങ്ങൾ അവരുടെ ഓർമയിലെ ഓണം പങ്കുവെച്ചു.മുൻ വാർഡ് കൗൺസിലർ ബിജിമോൾ മാത്യു ഓണാശംസ നേര്ന്നു.
