ഡല്ഹി: ഡല്ഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തില് നിന്നും വ്യാഴാഴ്ച രാവിലെ പറന്നുയര്ന്ന സ്പൈസ്ജെറ്റ് വിമാനം പാതിവഴിയില് തിരിച്ചിറക്കി.
മഹാരാഷ്ട്രയിലെ നാസിക്കിലേക്ക് പോവേണ്ടിയിരുന്ന വിമാനം ‘ഓട്ടോപൈലറ്റ്. തകരാറിനെത്തുടര്ന്ന് തിരിച്ച് ഇറക്കേണ്ടി വന്നതായി ഡിജിസിഎ അധികൃതര് അറിയിച്ചു. ബോയിങ് 737 എയര്ക്രാഫ്റ്റ് സുരക്ഷിതമായി തിരികെ ലാന്ഡ് ചെയ്തെന്നും അവര് വ്യക്തമാക്കി. യാത്രക്കാരെല്ലാവരും സുരക്ഷിതരാണ്.
“സ്പൈസ്ജെറ്റ് B737 വിമാനം VT-SLP, ഓപ്പറേറ്റിംഗ് ഫ്ലൈറ്റ് SG-8363 (ഡല്ഹി-നാസിക്) വ്യാഴാഴ്ച ഓട്ടോപൈലറ്റ് തകരാറിനെത്തുടര്ന്ന് മുന്നോട്ട് പോകാന് സാധിക്കാതെ പാതിവഴിയില് തിരിച്ചിറക്കേണ്ടി വന്നു,” അധികൃതര് വിശദീകരിച്ചു. ഇന്ധനവില കുത്തനെ ഉയരുകയും രൂപയുടെ മൂല്യം ഇടിയുകയും ചെയ്ത സാഹചര്യത്തില് സ്പൈസ്ജെറ്റ് വലിയ സാമ്പത്തിക പ്രതിസന്ധി നേരിടുന്നുണ്ട്. കമ്പനിയുടെ വിമാനങ്ങള് ഈയടുത്ത് തിരിച്ചിറക്കേണ്ട നിരവധി സാഹചര്യങ്ങള് റിപ്പോര്ട്ട് ചെയ്തിട്ടുണ്ട്.
