കോഴിക്കോട് : യുഡിഎഫിന്റെ വൻ വിജയത്തിന് പിന്നാലെ വി.ഡി. സതീശനെ കേരളത്തിന്റെ മുഖ്യമന്ത്രിയാക്കണമെന്ന് ആവശ്യപ്പെട്ട് സംസ്ഥാനത്തിന്റെ വിവിധ ഭാഗങ്ങളിൽ പോസ്റ്ററുകളും ഫ്ലക്സ് ബോർഡുകളും പ്രത്യക്ഷപ്പെട്ടു. കോഴിക്കോട് നഗരത്തിലും പാലക്കാട് മുണ്ടൂരിലുമാണ് സതീശനെ അനുകൂലിച്ച് പ്രധാനമായും ബോർഡുകൾ ഉയർന്നത്. “പട നയിച്ച് യുഡിഎഫിന് വൻവിജയം സമ്മാനിച്ച മതേതര കേരളത്തിന്റെ കാവലാൾ വി.ഡി. സതീശൻ കേരളത്തെ നയിക്കട്ടെ” എന്നാണ് കോഴിക്കോട് നഗരത്തിൽ സ്ഥാപിച്ച ഫ്ലക്സ് ബോർഡുകളിൽ പ്രധാനമായും കുറിച്ചിരിക്കുന്നത്. കോഴിക്കോട് നഗരത്തിലെ പ്രസ് ക്ലബ്ബ് പരിസരം, മാനാഞ്ചിറ, സി.എച്ച്. ഫ്ലൈ ഓവർ, മാവൂർ റോഡ് തുടങ്ങിയ പ്രധാന കേന്ദ്രങ്ങളിലെല്ലാം സതീശന് അഭിവാദ്യങ്ങൾ അർപ്പിച്ചുകൊണ്ടുള്ള ഈ ബോർഡുകൾ രാവിലെ മുതൽ കാണാമായിരുന്നു.
ഇന്നലെ കോഴിക്കോടിന്റെ മലയോര മേഖലകളായ കുറ്റ്യാടിയിലും അത്തോളിയിലും വി.ഡി. സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് നൂറുകണക്കിന് പ്രവർത്തകർ പങ്കെടുത്ത വലിയ പ്രകടനങ്ങൾ നടന്നിരുന്നു. ഇതിന് പിന്നാലെയാണ് നഗരത്തിലും വ്യാപകമായി പോസ്റ്ററുകൾ പ്രത്യക്ഷപ്പെട്ടത്. “കേരള ജനത ആഗ്രഹിച്ചത് സതീശൻ എന്ന പേരാണ്” എന്നാണ് പാലക്കാട് മുണ്ടൂരിലെ ഫ്ലക്സുകളിൽ പറയുന്നത്.
