കൊച്ചി: നല്ല കമ്മ്യൂണിസ്റ്റുകള് ഈ പ്രാവശ്യം യു.ഡി.എഫിന് വോട്ടുചെയ്യുമെന്ന് വി.ഡി. സതീശന് എം.എല്.എ. പാര്ട്ടി ജീര്ണതയില് നിന്ന് പുറത്ത് വരണമെന്ന് ആഗ്രഹിക്കുന്നവര് ഇത്തവണ നേതൃത്വത്തിന് ഒരു താക്കീത് നല്കുമെന്നും വി.ഡി.സതീശന് കൂട്ടിച്ചേര്ത്തു.
”നമ്മുടെ നാട്ടില് നല്ല കമ്മ്യൂണിസ്റ്റുകളുമുണ്ട്. നാടിനും നാട്ടുകാര്ക്കും നല്ലതുവരണം എന്നാഗ്രഹിക്കുന്ന അഴിമതി രഹിതരായ നല്ല മനുഷ്യര്. പക്ഷെ അവരുടെ പാര്ട്ടി കേരളത്തില് അതിന്റെ ചരിത്രത്തിലെ ഏറ്റവും വലിയ ജീര്ണത നേരിടുന്നു. മുഖ്യമന്ത്രിയുടെ ഓഫീസിലും പാര്ട്ടി സെക്രട്ടറിയുടെ വീട്ടിലും വരെ അന്വേഷണ ഏജന്സികള് എത്തി. പുറത്ത് പറയാന് കൊള്ളാത്ത കേസുകളാണ് ഏറെയും”
”നല്ല പാര്ട്ടിക്കാര് അപമാനഭാരത്താല് തല കുനിച്ചു നില്ക്കുന്നു. പാര്ട്ടി ഈ ജീര്ണതയില് നിന്ന് പുറത്ത് വരണമെന്ന് അവര് ആഗ്രഹിക്കുന്നു. അവര് ഇത്തവണ പാര്ട്ടി നേതൃത്വത്തിന് ഒരു താക്കീത് നല്കും. അതുകൊണ്ട് ഈ തിരഞ്ഞെടുപ്പില് നല്ല കമ്മ്യൂണിസ്റ്റുകള് യു.ഡി.എഫിന് വോട്ടു ചെയ്യും” -വി.ഡി സതീശന് ഫേസ്ബുക്കില് കുറിച്ചു.
