തിരുവനന്തപുരം: മുഖ്യമന്ത്രി പിണറായി വിജയനെതിരെ രൂക്ഷവിമര്ശനവുമായി പ്രതിപക്ഷ നേതാവ് വി ഡി സതീശന്. കാപട്യമേ നിന്റെ പേരോ പിണറായി എന്ന് ചോദിക്കേണ്ടി വരികയാണെന്ന് വി ഡി സതീശന് പറഞ്ഞു. എസ്ഡിപിഐ, പിഡിപി, ആര്എസ്എസ് പിന്തുണകളെക്കുറിച്ച് മുഖ്യമന്ത്രി മിണ്ടുന്നില്ലെന്ന് വി ഡി സതീശന് പറഞ്ഞു. എസ്ഡിപിഐ തീവ്രവാദ സംഘടനയെന്നാണ് പാര്ട്ടി കോണ്ഗ്രസില് വായിച്ചത്. തെരഞ്ഞെടുപ്പില് അവരുമായി കൂട്ടുചേര്ന്ന് മത്സരിക്കുകയാണ്. പാര്ട്ടി കോണ്ഗ്രസ് തീരുമാനത്തെപ്പോലും കാറ്റില്പ്പറത്തികൊണ്ടാണ് പിണറായി നീങ്ങുന്നത്- വി ഡി സതീശന് പറഞ്ഞു.
ബിജെപി ഈസ്റ്ററും ക്രിസ്തുമസും വരുമ്പോള് കേക്കുമായി ക്രൈസ്തവ ഭവനങ്ങളിലേക്ക് പോകും. എന്നിട്ടിപ്പോള് എഫ്സിആര്എ ഭേദഗതി ബില് വന്നു. ആട്ടിന്തോലിട്ട ചെന്നായ്ക്കളാണ് ബിജെപി. സിപിഐഎമ്മിന്റേയും ബിജെപിയുടെയും സംഘപരിവാറിന്റേയും മുഖം ഈ തെരഞ്ഞെടുപ്പില് പുറത്തുവരുമെന്നും പ്രതിപക്ഷ നേതാവ് പറഞ്ഞു.
