തിരുവനന്തപുരം: മുതലപ്പൊഴിയിലെ ദുരന്തങ്ങള് സര്ക്കാര് വരുത്തിവച്ചതാണെന്നു പ്രതിപക്ഷ നേതാവ് വി.ഡി.സതീശന്. വള്ളംമറിഞ്ഞ് ഒരാള് മരിക്കുകയും മൂന്നു പേരെ കാണാതാകുകയും ചെയ്തത് വേദനാജനകമാണ്. കഴിഞ്ഞ ഒരു മാസത്തിനിടെ മുതലപ്പൊഴിയില് പത്തിലേറെ അപകടങ്ങളാണു സംഭവിച്ചത്. മരണപ്പൊഴിയാകുന്ന മുതലപ്പൊഴിയെക്കുറിച്ച് 2021 ഓഗസ്റ്റില് പ്രതിപക്ഷം നിയമസഭയില് അടിയന്തര പ്രമേയത്തിന് നോട്ടിസ് നല്കിയിരുന്നു.
എല്ലാ പ്രശ്നങ്ങളും ഉടന് പരിഹരിക്കുമെന്നായിരുന്നു സര്ക്കാരിന്റെ ഉറപ്പ്. ഒരു പരിഹാരമാര്ഗവും ഉണ്ടാക്കാതിരുന്ന സര്ക്കാരാണ് മത്സ്യത്തൊഴിലാളികളെ മരണത്തിലേക്കു തള്ളിവിട്ടത്. നിരന്തരം ദുരന്തങ്ങളെ അഭിമുഖീകരിക്കുന്നവരുടെ പ്രതികരണം വൈകാരികമായിരിക്കും. അതു ഭരണകര്ത്താക്കള് മനസ്സിലാക്കണം. മുതലപ്പൊഴി സന്ദര്ശിച്ച മന്ത്രിമാരായ വി.ശിവന്കുട്ടിയും ആന്റണി രാജുവും ‘ഷോ കാണിക്കരുത്’ എന്നാണ് മത്സ്യത്തൊഴിലാളികളോടു പറഞ്ഞത്. പാവങ്ങളോടല്ല അധികാരത്തിന്റെ ധാര്ഷ്ട്യം കാട്ടേണ്ടത്. മന്ത്രിമാരുടെ പ്രസ്താവന അനുചിതവും പ്രകോപനപരവുമാണ്. തടയാന് ആഹ്വാനം ചെയ്തത് ഫാ.യൂജിന് പെരേരയാണെന്ന മന്ത്രി ശിവന്കുട്ടിയുടെ പ്രസ്താവന അപക്വമാണെന്നും അദ്ദേഹം കുറ്റപ്പെടുത്തി.
