തിരുവനന്തപുരം : സില്വര് ലൈന് പദ്ധതിക്ക് എതിരായ സമരത്തില് നിന്നും യു.ഡി.എഫ് പിന്മാറില്ലെന്ന് വ്യക്തമാക്കി പ്രതിപക്ഷ നേതാവ് വി.ഡി സതീശന്. സില്വര് ലൈന് സര്വ്വേ കല്ലുകള് പിഴുതെറിഞ്ഞ് തങ്ങള് ജയിലില് പോകുമെന്നും അദ്ദേഹം പറഞ്ഞു. യു.ഡി.എഫ് നേതാക്കള് ജയിലില് പോകാന് തയ്യാറാണ്. വിഷയത്തില് സാധാരണക്കാരെ ജയിലിലേക്ക് വിടില്ല. പദ്ധതിക്ക് പിന്നില് വന് അഴിമതി നടക്കുന്നുണ്ടെന്നും സതീശന് ആരോപിച്ചു. സില്വര് ലൈന് എതിരായ സമരത്തില് സാധാരണക്കാരാണ് ഉള്ളത്. സി.പി.എമ്മിന് നന്ദിഗ്രാമില് സംഭവിച്ചത് ഇവിടെയും ആവര്ത്തിക്കും. ധാര്ഷ്ട്യത്തിനും ഭീഷണിക്കും പാര്ട്ടി വഴങ്ങില്ലെന്നും അദ്ദേഹം വ്യക്തമാക്കി.
കെ.സി വേണുഗോപാലിന് എതിരെ ഉയര്ന്ന വിമര്ശനങ്ങളോടും പ്രതിപക്ഷ നേതാവ് പ്രതികരിച്ചു. ‘ഒരു സംഘം പ്രവര്ത്തകര് പാര്ട്ടിയെ ദുര്ബലപ്പെടുത്താന് മനഃപൂര്വ്വം ശ്രമിക്കുകയാണ്. സംഭവത്തില് ഇവര്ക്കെതിരെ നടപടി എടുക്കണമെന്ന് അച്ചടക്ക സമിതിയോട് ആവശ്യപ്പെട്ടിട്ടുണ്ട്’ സതീശന് അറിയിച്ചു. സില്വര് ലൈന് പദ്ധതിക്ക് എതിരെ പ്രതിഷേധിക്കുന്നവരോട് പോലീസ് കാണിക്കുന്ന അതിക്രമം കോണ്ഗ്രസ് പാര്ലമെന്റിലും ഉന്നയിച്ചു. പോലീസിന്റെ അതിക്രമത്തിന് എതിരെ കെ.മുരളീധരന് എംപി ലോകസഭയില് അടിയന്തര പ്രമേയത്തിന് നോട്ടീസ് നല്കി. ജനങ്ങള്ക്കെതിരായ പോലീസിന്റെ അതിക്രമം പാര്ലമെന്റ് ചര്ച്ച ചെയ്യണമെന്നും, സംസ്ഥാനത്തെ സാഹചര്യം ക്രമസമാധാന തകര്ച്ചയിലേക്ക് നീങ്ങുകയാണെന്നും കെ.മുരളീധരന് നോട്ടീസില് പ്രതിപാദിച്ചു.
