തിരുവനന്തപുരം: സംസ്ഥാനത്ത് കൊവിഡ് പ്രതിരോധ പ്രവര്ത്തനങ്ങള് ശക്തിപ്പെടുത്താന് എല്ലാ ജില്ലകള്ക്കും നിര്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ്. കൊവിഡ് കേസുകള് വര്ധിക്കുന്നത് മുന്നില് കണ്ടുള്ള സര്ജ് പ്ലാനുകള് എല്ലാ ജില്ലകളും തയ്യാറാക്കിയിട്ടുണ്ട്. ആര്സിസി, എംസിസി, ശ്രീചിത്ര, സ്വകാര്യ ആശുപത്രികള് എന്നിവര് കൊവിഡ് രോഗികള്ക്കായി പ്രത്യേകമായി കിടക്കകള് മാറ്റിവയ്ക്കണം. ആവശ്യകത മുന്നില് കണ്ട് പരിശോധനാ കിറ്റുകള്, സുരക്ഷാ സാമഗ്രികള് എന്നിവ സജ്ജമാക്കാന് കെ.എം.എസ്.സി.എല്.ന് നിര്ദേശം നല്കി.
അതേസമയം സംസ്ഥാനത്ത് ഇന്ന് 765 പേര്ക്കാണ് കൊവിഡ് സ്ഥിരീകരിച്ചത്. ഒരു മാസത്തിനിടെ 20 പേര് കൊവിഡ് ബാധിച്ച് മരിച്ചെന്ന കണക്കും സംസ്ഥാന ആരോഗ്യവകുപ്പ് ഇന്ന് സ്ഥിരീകരിച്ചു. 20 കോവിഡ് മരണം ഉണ്ടായിട്ടുള്ളതില് 60 വയസിന് മുകളില് പ്രായമുള്ളവരാണ് അധികവും. ഐസിയുവില് ചികിത്സയിലുള്ളവരിലധികവും പ്രായമുള്ളവരാണ്. അവരില് പ്രമേഹവും, രക്താദിമര്ദവും തുടങ്ങിയ ജീവിതശൈലി രോഗങ്ങളുള്ളവരാണ് അധികവും. ജീവിതശൈലി രോഗം ഉളളവര്, ഗര്ഭിണികള്, പ്രായമായവര് , കുട്ടികളും ലക്ഷണം കണ്ടാല് പരിശോധിക്കണമെന്ന് ആവശ്യപ്പെട്ടിട്ടുണ്ട്.
