തിരുവനന്തപുരം : ശാസ്ത്രീയ മാര്ഗങ്ങളിലൂടെയുള്ള ജനസംഖ്യാ നിയന്ത്രണം വികസിത സമൂഹത്തിന് അനിവാര്യമാണെന്ന് ആരോഗ്യ മന്ത്രി വീണാ ജോര്ജ്. ജനസംഖ്യാ നിയന്ത്രണം വ്യക്തികളുടെ ആരോഗ്യ സംരക്ഷണയില് കൂടുതല് ശ്രദ്ധ ചെലുത്താന് കഴിയുന്ന സാഹചര്യം സൃഷ്ടിക്കുന്നു. കുടുംബാസൂത്രണം കുടുംബത്തിന്റെ പുരോഗതിയെ ഏറെ സഹായിക്കുമെന്നും മന്ത്രി പറഞ്ഞു.
എപ്പോള് ഗര്ഭധാരണം നടത്തണമെന്ന് തീരുമാനിക്കുന്നതിനും അമ്മയുടെയും കുഞ്ഞിന്റെയും ആരോഗ്യം ഉറപ്പുവരുത്താനും കുടുംബാസൂത്രണത്തിലൂടെ സാധിക്കുന്നു. മാത്രമല്ല കുട്ടികളുടെ എണ്ണം പരിമിതപ്പെടുത്തുന്നതോടൊപ്പം കുട്ടികളെ നന്നായി വളര്ത്താനും അവര്ക്ക് നല്ല വിദ്യാഭ്യാസം നല്കാനും സാധിക്കുന്നു. അതിലൂടെ ആ വ്യക്തിയുടെ മാത്രമല്ല സമൂഹത്തിന്റെയും രാജ്യത്തിന്റെയും പുരോഗതിക്ക് കാരണമാകുമെന്നും മന്ത്രി വ്യക്തമാക്കി.
എല്ലാവര്ക്കും കുടുംബാസൂത്രണ മാര്ഗങ്ങളെക്കുറിച്ച് അവബോധം ഉണ്ടായിരിക്കണം. അമ്മയുടെയും കുഞ്ഞിന്റെയും ആരോഗ്യത്തിന് പ്രസവങ്ങള് തമ്മില് കുറഞ്ഞത് മൂന്ന് വര്ഷത്തെ ഇടവേള വേണം. താല്ക്കാലിക ഗര്ഭനിരോധ മാര്ഗങ്ങളായ കോണ്ടം, ഗര്ഭനിരോധന ഗുളികകള് എന്നിവ സബ് സെന്ററില് നിന്നും ലഭ്യമാണ്. കോപ്പര്ടി നിക്ഷേപിക്കുവാനുള്ള സൗകര്യം പ്രാഥമികാരോഗ്യ കേന്ദ്രം മുതല് മുകളിലേക്കുള്ള ആരോഗ്യ കേന്ദ്രങ്ങളില് നിന്നും ലഭ്യമാണ്.
ഭാവിയില് ഇനി കുട്ടികള് വേണ്ട എന്ന തീരുമാനം എടുത്തവര്ക്ക് സ്ഥിരമായി ഗര്ഭനിരോധ മാര്ഗങ്ങള് ഉപയോഗിക്കാം. ഇതിനായി ട്യൂബക്ടമി ശസ്ത്രക്രിയയും പുരുഷന്മാര്ക്ക് വേണ്ടിയുള്ള വാസക്ടമിയുമാണ് നിലവിലുള്ളത്. മിനി ലാപ്രോട്ടമി, ലാപ്രോസ്കോപ്പി, പോസ്റ്റുപാര്ട്ടം സ്റ്റെറിലൈസേഷന് എന്നീ പേരുകളിലാണ് ട്യൂബക്ടമി അറിയപ്പെടുന്നത്.
ഈ ശസ്ത്രക്രിയകള് താലൂക്ക്, ജില്ലാ ആശുപത്രികള്, സ്ത്രീകളുടെയും കുട്ടികളുടെയും ആശുപത്രികള്, മെഡിക്കല് കോളേജുകള് എന്നിവിടങ്ങളില് നിന്നും ലഭ്യമാണ്. സംശയങ്ങള്ക്ക് തൊട്ടടുത്തുള്ള ആരോഗ്യ പ്രവര്ത്തകരുമായോ ദിശ 104, 1056, 0471-2552056 എന്നീ നമ്പറുകളിലോ ബന്ധപ്പെടാവുന്നത് ആണെന്നും ആരോഗ്യമന്ത്രി പറഞ്ഞു.
