തിരുവനന്തപുരം : കഴക്കൂട്ടത്ത് ആക്രിക്കാരന്റെ ചവിട്ടേറ്റ് ഗൃഹനാഥന് മരിച്ച കേസില് പ്രതി പിടിയില്. കൊല്ലം നടുവിലശ്ശേരി തൃക്കരുവ സ്വദേശി വിജയകുമാര് എന്ന 48-കാരനാണ് അറസ്റ്റിലായത്. ഇന്ന് രാവിലെ അഞ്ചാലുംമൂടിന് സമീപം തൃക്കരുവയില് നിന്നാണ് ഇയാളെ പിടികൂടിയത്. കഴക്കൂട്ടം, നെട്ടയക്കോണം സ്വദേശി കെ ഭുവനചന്ദ്രന് (65) ആണ് ഇന്നലെ കൊല്ലപ്പെട്ടത്. കഴക്കൂട്ടത്ത് റോഡരില് കരിക്ക് വില്പ്പനക്കാരനുമായി ഭുവനചന്ദ്രന് സംസാരിക്കുന്നതിനിടെ അതുവഴി ആക്രി പെറുക്കാന് വന്ന വിജയകുമാര് കാര്ക്കിച്ച് തുപ്പുകയായിരുന്നു. തന്റെ സമീപത്ത് തുപ്പിയതിനെ ഭുവനചന്ദ്രന് ചോദ്യം ചെയ്തു.
ഇതിനെത്തുടര്ന്നുണ്ടായ വാക് തര്ക്കത്തിനിടെ ഭുവനചന്ദ്രനെ ആക്രിക്കാരന് ചവിട്ടി എന്നാണ് ദൃക്സാക്ഷികളുടെ ആരോപണം. കരള് രോഗത്തിന് ശസ്ത്രക്രിയ കഴിഞ്ഞയാളായിരുന്നു ഭുവനചന്ദ്രന്. വയറില് ശക്തമായ ചവിട്ടേറ്റതിനെ തുടര്ന്ന് കുഴഞ്ഞു വീണ ഭുവനചന്ദ്രനെ കഴക്കൂട്ടത്തെ സ്വകാര്യ ആശുപത്രിയിലും തുടര്ന്ന് മെഡിക്കല് കോളേജിലും പ്രവേശിപ്പിച്ചെങ്കിലും ജീവന് രക്ഷിക്കാനായില്ല.
