തിരുവനന്തപുരം : ആരോഗ്യ മന്ത്രി വീണാ ജോര്ജും ഡെപ്യൂട്ടി സ്പീക്കര് ചിറ്റയം ഗോപകുമാറും തമ്മിലുള്ള പോര് മുറുകുന്നു. ഒരേ ജില്ലയില് നിന്നുള്ള രണ്ട് ക്യാബിനറ്റ് റാങ്കുള്ള വ്യക്തികള് തമ്മിലെ ചക്കുളത്തിപ്പോരിനെ കൗതുകത്തോടെയാണ് എല്ലാവരും നോക്കികാണുന്നത്. ഏറ്റവും ഒടുവില് രൂക്ഷ വിമര്ശനം ഉന്നയിച്ച ചിറ്റയം ഗോപകുമാറിനെതിരെ ആരോഗ്യ മന്ത്രി വീണാ ജോര്ജ് എല്.ഡി.എഫിന് പരാതി നല്കിയിരിക്കുകയാണ്. അടിസ്ഥാന രഹിതമായ ആരോപണങ്ങളാണ് ഉന്നയിക്കുന്നതെന്നാണ് പരാതി. കഴിഞ്ഞദിവസമാണ് ഡെപ്യൂട്ടി സ്പീക്കര് വാര്ത്താസമ്മേളനത്തില് മന്ത്രി വീണാ ജോര്ജ്ജിനെതിരെ കടന്നാക്രമിച്ചത്.
പത്തനംതിട്ട ജില്ലയുടെ ചുമതലയുള്ള മന്ത്രി കൂടിയാലോചനകള് നടത്തുന്നില്ലെന്നായിരുന്നു ആരോപണം. ഫോണ് വിളിച്ചാല് എടുക്കില്ലെന്നും അടൂര് എം.എല്.എ കൂടിയായ ചിറ്റയം പറയുന്നു. പതിവായി അവഗണിക്കുന്ന പശ്ചാത്തലത്തില് സംസ്ഥാന സര്ക്കാരിന്റെ എന്റെ കേരളം പ്രദര്ശന മേള ഉദ്ഘാടനത്തില് നിന്നും ചിറ്റയം ഗോപകുമാര് വിട്ടുനിന്നു. അതേ സമയം സര്ക്കാറിന്റെ ഒന്നാം വാര്ഷിക പരിപാടിയിലേക്ക് എം.എല്.എമാര് ഉള്പ്പെടെയുള്ളവരെ ക്ഷണിക്കേണ്ടത് ജില്ലാ ഭരണകൂടമാണെന്നും മന്ത്രിയല്ലെന്നും മന്ത്രി എല്.ഡി.എഫിനു നല്കിയ പരാതിയില് ചൂണ്ടിക്കാട്ടുന്നു. നേരത്തെ തന്നെ വീണയ്ക്ക് എതിരെ സിപിഎം ജില്ലാ നേതൃത്വത്തിന് ചിറ്റയം പരാതി നല്കിയിരുന്നു. ഇതില് ഇടപെടല് ഉണ്ടായില്ലെന്നതിലാണ് പരസ്യ നിലപാടുമായി രംഗത്തുവരാന് ചിറ്റയം തുനിഞ്ഞിറങ്ങിയതെന്നാണ് വിലയിരുത്തല്.
താന് അധ്യക്ഷത വഹിക്കേണ്ട പരിപാടിയെക്കുറിച്ച് അറിയിപ്പ് ലഭിച്ചത് തലേന്ന് രാത്രിയാണ്. അതുകൊണ്ട് കൂടിയാണ് സര്ക്കാരിന്റെ ഒന്നാം വാര്ഷികത്തോട് അനുബന്ധിച്ച് ജില്ലാ സ്റ്റേഡിയത്തില് നടത്തുന്ന എന്റെ കേരളം പ്രദര്ശന മേളയുടെ ഉദ്ഘാടനത്തില് പങ്കെടുക്കാതിരുന്നത്. യുഡിഎഫ് സര്ക്കാരിന്റെ കാലത്ത് പോലും ഇതുപോലെ അവഗണിക്കപ്പെട്ടിട്ടില്ലെന്നും ചിറ്റയം ആരോപിച്ചു. ‘സര്ക്കാരിന്റെ വാര്ഷിക പരിപാടിയിലേക്ക് മന്ത്രി വീണാ ജോര്ജ്ജ് തന്നെ ക്ഷണിച്ചില്ല. പങ്കെടുക്കണം എന്ന് വിളിച്ച് പറഞ്ഞത് ജില്ലാ കലക്ടര്. തന്റെ മണ്ഡലത്തിലെ പരിപാടികള് പോലും മന്ത്രി അറിയിക്കാറില്ല. മന്ത്രിക്ക് ഏകോപനം എന്തെന്ന് അറിയില്ലെന്നും’ ഡെപ്യൂട്ടി സ്പീക്കര് ചിറ്റയം ഗോപകുമാര് വിമര്ശിച്ചിരുന്നു.
