ചെന്നൈ: സര്ക്കാര് ഉദ്യോഗസ്ഥനെ വെട്ടിക്കൊന്നു. തമിഴ്നാട്ടിലെ തൂത്തുക്കുടിയിലാണ് സംഭവം. തൂത്തുക്കുടിയില് വില്ലേജ് അഡ്മിനിസ്ട്രേറ്റീവ് ഓഫീസറായി ജോലി ചെയ്തിരുന്ന ലുര്ദു ഫ്രാന്സിസിനെയാണ് രണ്ട് പേര് ചേര്ന്ന് വെട്ടിക്കൊന്നത്. നാട്ടുകാര് ചേര്ന്ന് ഇയാളെ തിരുനെല്വേലി സര്ക്കാര് ആശുപത്രിയില് എത്തിച്ചെങ്കിലും ജീവന് രക്ഷിക്കാന് കഴിഞ്ഞില്ല. സംഭവത്തിന് പിന്നാലെ പോലീസ് സ്ഥലത്തെത്തി, അന്വേഷണത്തിന്റെ അടിസ്ഥാനത്തില് ഒരാളെ കസ്റ്റഡിയിലെടുത്തു.
ഉച്ചയ്ക്ക് 12.30ഓടെയാണ് സംഭവം. ആക്രമണം പ്രതിരോധിക്കുന്നതിനിടെ ലുര്ദു ഫ്രാന്സിസിന്രെ രണ്ട് കൈകള്ക്കും പരിക്കേല്ക്കുകയും, തലയോട്ടിയില് ആഴത്തിലുള്ള മുറിവുകളും ഉണ്ടായി. അദ്ദേഹത്തെ ഉടന് മെഡിക്കല് കോളേജില് എത്തിച്ചെങ്കിലും മരണപ്പെടുകയായിരുന്നു. അതേസമയം കൊല്ലപ്പെട്ടയാളുടെ കുടുംബത്തിന് ഒരു കോടി രൂപയും, കുടുംബാംഗങ്ങളില് ഒരാള്ക്ക് സര്ക്കാര് ജോലിയും നല്കുമെന്ന് മുഖ്യമന്ത്രി എംകെ സ്റ്റാലിന് പ്രഖ്യാപിച്ചു.
