പത്തനംതിട്ട: കംബോഡിയയില് ജോലി വാഗ്ദാനം ചെയ്ത് ലക്ഷങ്ങള് തട്ടിയ സംഭവത്തില് ഏജന്റിനെതിരെ ആലുവ വെസ്റ്റ് ആലങ്ങാട് പോലീസ് അന്വേഷണം ആരംഭിച്ചു.ഏജന്റ് പത്തനംതിട്ട സ്വദേശി അരുണ് കുമാറിനെതിരെ നീറിക്കോട് കണ്ടത്തില്പറമ്പില് സിബിന് ആന്റണി നല്കിയ കേസിലാണ് അന്വേഷണം. ഇയാള്ക്ക് പുറമെ കരിങ്ങാംതുരുത്ത് സ്വദേശി ഉണ്ണികൃഷ്ണന് എന്നയാള് കഴിഞ്ഞ ദിവസം വരാപ്പുഴ പോലീസിലും പരാതി നല്കിയിട്ടുണ്ട്. ഈ പരാതിയുടെയും കൂടി അടിസ്ഥാനത്തിലാണ് അന്വേഷണം ആരംഭിച്ചത്.
പത്ത് പേരോളം വിസക്ക് പണം നല്കിയിട്ടുണ്ട്. വിസ തട്ടിപ്പിന് ഇരയായവരുടെ എണ്ണം ആലങ്ങാട് മേഖലയില് ഇനിയും കൂടുമെന്നാണ് വിവരം. കംബോഡിയയില് ടൈപ് റൈറ്റിങ്, കസ്റ്റമര് കെയര് ജോലി തുടങ്ങിയ ജോലികള്ക്ക് വിസ വാഗ്ദാനം ചെയ്താണ് യുവാക്കളില്നിന്ന് അരുണ് കുമാര് മൂന്ന് ലക്ഷം രൂപ വീതം വാങ്ങിയതെന്നാണ് പരാതിയില് പറയുന്നത്.പണം നല്കി മാസങ്ങള് കഴിഞ്ഞിട്ടും വിസ ലഭിക്കാതെ വന്നപ്പോഴാണ് ഏജന്റിനെതിരെ തട്ടിപ്പിനിരയായവരില് ചിലര് പോലീസില് പരാതി നല്കിയത്. പലരുടെയും പാസ്പോര്ട്ടുകളും മറ്റ് രേഖകളും ഏജന്റിന്റെ കൈവശത്തിലായതും ഇവരെ പ്രതിസന്ധിയിലാക്കിയിരിക്കുകയാണ്.
