മുതലമട : പെട്രോൾ, ഡീസൽ വിലവർധനയിൽ പ്രതിഷേധിച്ച്‌ ‘പാലക്കാട്ടുനിന്ന്‌ പാർലമെന്റിലേക്ക്’ എന്ന മുദ്രാവാക്യവുമായി മുതലമട സ്വദേശി സി.വിഷ്ണു സൈക്കിളിൽ ഡൽഹിയിലെത്തി. യൂത്ത് കോൺഗ്രസ് ജില്ലാ ജനറൽ സെക്രട്ടറിയായ വിഷ്ണു നടത്തിയ സൈക്കിൾ സമരയാത്ര 53 ദിവസം കൊണ്ട്‌ ഏഴ്‌ സംസ്ഥാനങ്ങളിലൂടെ 2961 കിലോമീറ്റർ പിന്നിട്ടാണ് സമരയാത്ര ഡൽഹിയിലെത്തിയത്.
ഗ്രാമങ്ങളിലും നഗരങ്ങളിലും തീരദേശമേഖലകളിലുമെല്ലാം യാത്രയ്ക്ക് നല്ല പിന്തുണ ജനങ്ങളിൽനിന്ന്‌ ലഭിച്ചെന്ന് സി.വിഷ്ണു പറഞ്ഞു. ഡൽഹി കേരള ഹൗസിൽ മുൻമുഖ്യമന്ത്രി ഉമ്മൻ‌ചാണ്ടി, ബെന്നി ബെഹനാൻ എം.പി., ചാണ്ടി ഉമ്മൻ എന്നിവർ സമരയാത്രയെ സ്വീകരിച്ചു. വെള്ളിയാഴ്ച പാർലമെന്റ് പരിസരത്തു നടക്കുന്ന സമരയാത്രയ്ക്കുള്ള സ്വീകരണത്തിൽ യൂത്ത് കോൺഗ്രസ് ദേശീയ പ്രസിഡന്റ് ബി.വി ശ്രീനിവാസ്, സംസ്ഥാന പ്രസിഡൻറ് ഷാഫി പറമ്പിൽ തുടങ്ങിയവർ പങ്കെടുക്കും. കൊല്ലത്തുനിന്നുള്ള റാഫിയും വിഷ്ണുവിനോടൊപ്പം സമരയാത്രയിലുണ്ടായിരുന്നു.
