തിരുവനന്തപുരം : നാല് വയസുകാരന് വൈറ്റമിന് സിറപ്പ് അളവില് കൂടുതല് നല്കിയതിനെ തുടര്ന്ന് കുഞ്ഞ് അവശനിലയില്. കുളത്തൂര് പ്രാഥമികാരോഗ്യകേന്ദ്രത്തിലെ ജീവനക്കാരുടെ ഭാഗത്തു നിന്നാണ് ഗുരുതര വീഴ്ചയുണ്ടായിരിക്കുന്നത്. അവശ നിലയിലായ കുട്ടി നിലവില് എസ് എ ടി ആശുപത്രിയില് ചികിത്സയിലാണ്. മെയ് 11-നാണ് സംഭവം നടന്നത്. നാല് വയസ്സുള്ള ഇരട്ടക്കുട്ടികള്ക്കായി നല്കേണ്ട ഡോസാണ് ആശ വര്ക്കര് ആളുമാറി ഒരാള്ക്ക് തന്നെ നല്കിയത്. വൈറ്റമിന് എയുടെ ഡബിള് ഡോസാണ് കുട്ടിക്ക് നല്കിയത്.
സ്റ്റാഫ് നഴ്സ് ഉണ്ടായിട്ടും മരുന്ന് നല്കിയത് ആശാ വര്ക്കറെന്ന് രക്ഷിതാക്കള് ആരോപിക്കുന്നു. കരോട് സ്വദേശി മഞ്ജുവിന്റെ മകന് നിവിനാണ് ആശുപത്രിയില് ചികിത്സയിലുള്ളത്. ഇരട്ടസഹോദരനൊപ്പം വൈറ്റമിന് എ സ്വീകരിക്കാനെത്തിയ നിവിന് അബദ്ധത്തില് ആശാ വര്ക്കര് രണ്ട് ഡോസുകള് നല്കുകയായിരുന്നു. പിന്നീട് കടുത്ത ഛര്ദിയുണ്ടായതിനെ തുടര്ന്ന് കുഞ്ഞിനെ ആശുപത്രിയില് പ്രവേശിപ്പിക്കുകയായിരുന്നു. സംഭവത്തെ തുടര്ന്ന് ആശാ വര്ക്കറെ ജോലിയില് നിന്നും മാറ്റി നിര്ത്താന് ഡിഎംഒ ആവശ്യപ്പെട്ടു.
