വിഴിഞ്ഞo: വിഴിഞ്ഞത്ത് വീണ്ടും സംഘർഷാവസ്ഥ. തുറമുഖ നിര്മ്മാണം വീണ്ടും തുടങ്ങുമെന്ന് അദാനിയുടെ അറിയിപ്പ് ലഭിച്ചതോടെ സമരം നടത്തിയ മത്സ്യത്തൊഴിലാളികൾ പ്രദേശത്തേക്ക് പ്രതിഷേധവുമായി എത്തുകയായിരുന്നു. പദ്ധതി പ്രദേശത്തേക്ക് വാഹനങ്ങൾ കടത്തിവിടില്ലെന്ന നിലപാടിലാണ് സമര സമിതി. വാഹനങ്ങൾക്ക് മുന്നിൽ കിടന്ന് കൊണ്ട് പ്രതിഷേധിച്ച സമരക്കാരെ പോലീസ് അനുനയിപ്പിച്ച് നീക്കി.
അതിനിടെ സ്ഥലത്തേക്ക് തുറമുഖ നിര്മ്മാണത്തെ അനുകൂലിക്കുന്ന മറ്റൊരു സംഘവുമെത്തിയതോടെ കൂടുതൽ സംഘര്ഷാവസ്ഥയുണ്ടായി. ചേരി തിരിഞ്ഞ് ഇരുവിഭാഗങ്ങളും ഏറ്റുമുട്ടിയതോടെ അനുനയിപ്പിക്കാൻ പോലീസ് ബുദ്ധിമുട്ടി. അതിനിടെ പ്രതിഷേധക്കാരിൽ ചിലർ കല്ലേറും ആരംഭിച്ചു. പോലീസ് സംരക്ഷണ ഉത്തരവ് വന്ന് നൂറുദിവസമായിട്ടും വിഴിഞ്ഞത്ത് നിർമാണ പ്രവർത്തനം തടസപ്പെടുകയാണെന്ന് അദാനി ഗ്രൂപ്പ് ഹൈക്കോടതിയെ കഴിഞ്ഞ ദിവസം അറിയിച്ചിരുന്നു. തുടർന്ന് പദ്ധതി പ്രദേശത്തേക്കുള്ള വാഹനങ്ങൾ തടയില്ലെന്ന് സമരസമിതി ഹൈക്കോടതിയിൽ ഉറപ്പു നൽകിയതിന് പിന്നാലെയാണ് ഇന്ന് നിര്മ്മാണ പ്രവത്തികൾ ആരംഭിക്കുമെന്ന് കമ്പനി സർക്കാരിനെ അറിയിച്ചത്.
