തിരുവനന്തപുരം: വിഴിഞ്ഞം തുറമുഖത്ത് മത്സ്യത്തൊഴിലാളികളുടെ ഉപരോധ സമരം ഇന്നും തുടരും. തുടര്ച്ചയായ അഞ്ചാം ദിവസമാണ് സമരം നടക്കുന്നത്. സര്ക്കാരുമായി കഴിഞ്ഞ ദിവസം നടത്തിയ ചര്ച്ച ഫലപ്രദമായിരുന്നുവെങ്കിലും തങ്ങളുടെ ആവശ്യങ്ങള് എല്ലാം അംഗീകരിക്കുന്നത് വരെ സമരം തുടരുമെന്നാണ് മത്സ്യത്തൊഴിലാളികളുടെയും ലത്തീന് അതിരൂപതയുടെയും നിലപാട്.
ഇന്നും കൂടുതല് മത്സ്യത്തൊഴിലാളി കുടുംബങ്ങള് സമരവേദിയിലേക്ക് എത്തും. ചര്ച്ചയില് പുനരധിവാസം, മുതലപ്പൊഴി പ്രതിസന്ധി അടക്കം 5 പ്രശ്നങ്ങള്ക്ക് പരിഹാരത്തിന് ധാരണയായിരുന്നു. തുറമുഖ നിര്മ്മാണം നിര്ത്തിവെയ്ക്കുക, മണ്ണെണ്ണ സബ്സിഡി വര്ദ്ധിപ്പിക്കുക എന്നീ ആവശ്യങ്ങളില് മുഖ്യമന്ത്രിയുമായി തുടര് ചര്ച്ച നടക്കും. സമരം പ്രക്ഷുബ്ധമാകില്ലെന്ന് ഇന്നലെ നടന്ന ചര്ച്ചയില് സമരസമിതി സര്ക്കാരിന് ഉറപ്പ് നല്കിയിട്ടുണ്ട്.
