പത്തനംതിട്ട: വിഴിഞ്ഞം സമരത്തില് ലത്തീന് സമുദായക്കാര് ഒന്നിച്ചുനിന്നു ശക്തികാട്ടിയപ്പോള് സര്ക്കാര് മുട്ടിടിച്ചുനില്ക്കുകയാണെന്ന് എസ്.എന്.ഡി.പി.യോഗം ജനറല് സെക്രട്ടറി വെള്ളാപ്പള്ളി നടേശന്.
എസ്.എന്.ഡി.പി. യോഗം പത്തനംതിട്ട യൂണിയന്റെ ആഭിമുഖ്യത്തില് നടന്ന ചതയദിന ഘോഷയാത്രയും സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. വിഴിഞ്ഞം സമരം പ്രഖ്യാപിച്ച ലത്തീന് സമുദായം ഉന്നയിച്ച പത്ത് ആവശ്യങ്ങളില് ഒന്പതും സര്ക്കാര് അംഗീകരിച്ചു. ഹാര്ബര് നിര്മാണം നിര്ത്തിവെച്ചു പഠനം നടത്തണമെന്ന ഒറ്റ ആവശ്യംമാത്രമാണ് സര്ക്കാര് അംഗീകരിക്കാതിരുന്നത്. എന്നാല് പഠനം നടത്താന് പ്രത്യേക സമിതിയെ നിയോഗിക്കാമെന്നു സര്ക്കാര് സമ്മതിച്ചതു പത്തില് ഒന്പതര ആവശ്യവും അംഗീകരിച്ചതിനു തുല്യമാണ്.
സംഘടിച്ചു ശക്തരായാല്മാത്രമേ ആവശ്യങ്ങള് നേടിയെടുക്കാന് കഴിയൂവെന്നാണ് ഇക്കാര്യം ഓര്മിപ്പിക്കുന്നത്. ഇതു പറയുമ്പോള് ജാതി പറയുന്നുവെന്ന് ആക്ഷേപിക്കും. കുറച്ചുനാള് കഴിയുമ്പോള് എല്.ഡി.എഫ്. ഈഴവര്ക്ക് അന്യമാകും. ആദര്ശ രാഷ്ട്രീയംകൊണ്ടു നാടു ഭരിക്കാന് കഴിയില്ലെന്ന് എല്.ഡി.എഫിനു മനസിലായി. ആദര്ശംകൊണ്ട് അധികാരം നിലനിര്ത്താന് കഴിയില്ലെന്ന് എല്.ഡി.എഫ്. ചിന്തിച്ചു തുടങ്ങി. കോണ്ഗ്രസില് ഇപ്പോള് ഈഴവ നേതാവായിട്ട് ഒരാളേയുള്ളൂ. ജനാധിപത്യം മതാധിപത്യത്തിനു കീഴടങ്ങിയെന്നും വെള്ളാപ്പള്ളി പറഞ്ഞു.
