തിരുവനന്തപുരം: വട്ടിയൂർക്കാവ് എം.എൽ.എ വി.കെ. പ്രശാന്തിന്റെ ഓഫിസിനുള്ളിൽ ശാസ്തമംഗലത്തെ ബി.ജെ.പി കൗൺസിലർ ആർ. ശ്രീലേഖ അതിക്രമിച്ച് കയറി സ്വന്തമായി ഓഫിസ് തുറന്നു എന്ന പരാതിയിൽ രൂക്ഷമായ പരിഹാസവുമായി ശ്രീലേഖ രംഗത്തെത്തി. തനിക്കെതിരെ മുഖ്യമന്ത്രിക്ക് ലഭിച്ച പരാതിയെ ‘ഓലപ്പാമ്പിനെ കാട്ടി പേടിപ്പിക്കുക’ എന്നാണ് ശ്രീലേഖ വിശേഷിപ്പിച്ചത്. സംഭവത്തെക്കുറിച്ചും തനിക്കെതിരായ നീക്കങ്ങളെക്കുറിച്ചും ശ്രീലേഖ ഒരു വീഡിയോയിലൂടെയാണ് പ്രതികരണം അറിയിച്ചത്.
പുതുവർഷ ദിനത്തിലെ തിരക്കിട്ട ജോലികൾക്ക് ശേഷം വീട്ടിലെത്തിയപ്പോഴാണ് തനിക്കെതിരെ ഏതോ ഒരു കമ്മ്യൂണിസ്റ്റ് വക്കീൽ മുഖ്യമന്ത്രിക്കു പരാതി നൽകിയിരിക്കുന്ന വിവരം അറിഞ്ഞതെന്ന് ശ്രീലേഖ പറഞ്ഞു. വട്ടിയൂർക്കാവ് എം.എൽ.എയുടെ ഓഫിസിൽ അതിക്രമിച്ചു കയറി സ്വന്തമായി ഓഫിസ് തുറന്നുവെന്നും അതിനാൽ ഉടൻതന്നെ കേസെടുത്ത് തന്നെ അറസ്റ്റ് ചെയ്ത് ജയിലിൽ അടയ്ക്കണമെന്നുമാണ് പരാതിയിലെ പ്രധാന ആവശ്യം. ഈ പരാതി മുഖ്യമന്ത്രി തുടർ നടപടികൾക്കായി ഡി.ജി.പിക്ക് അയച്ചിട്ടുണ്ടെന്നാണ് വിവരമെന്നും ശ്രീലേഖ പറഞ്ഞു.
ഈ വിഷയത്തെ രാഷ്ട്രീയപരമായി കൈകാര്യം ചെയ്യാനുള്ള ശ്രമമെന്ന നിലയിലാണ് ശ്രീലേഖയുടെ പ്രതികരണം വിലയിരുത്തപ്പെടുന്നത്. സമൂഹമാധ്യമങ്ങളിൽ പങ്കുവെച്ച വീഡിയോയിൽ ഇങ്ങനെയുള്ള പരാതികളെയും ഭീഷണികളെയും ഭയമില്ലെന്ന് അവർ വ്യക്തമാക്കി. കൗൺസിലർ എന്ന നിലയിൽ ജനങ്ങൾക്ക് വേണ്ടി പ്രവർത്തിക്കുമ്പോൾ ഉണ്ടാകുന്ന വെല്ലുവിളികളെ നേരിടാൻ താൻ തയ്യാറാണെന്നും അവർ പറഞ്ഞു. ഈ സംഭവം പ്രാദേശിക രാഷ്ട്രീയത്തിൽ പുതിയ ചർച്ചകൾക്ക് വഴിതുറന്നിരിക്കുകയാണ്.
