പാലക്കാട് : വോട്ടെണ്ണൽ പുരോഗമിക്കുമ്പോൾ തൃത്താലയിൽ വിടി ബൽറാം എം ബി രാജേഷിനെ പിന്നിലാക്കി ഏറെ മുന്നിൽ കുതിപ്പ് തുടരുകയാണ്. ഇതിനിടെ സാമൂഹിക മാധ്യമങ്ങളിൽ വി ടി ബൽറാം പങ്കുവെച്ച പോസ്റ്റ് വൈറലായിരിക്കുകയാണ്. `കം ബാക്ക്, താങ്ക്യു തൃത്താല’ എന്നായിരുന്നു പോസ്റ്റിൽ കുറിച്ചിരിക്കുന്നത്. ഒപ്പം എം. ബി രാജേഷിന്റെ മുന്നിൽ നിന്നുള്ള സെൽഫിയും പങ്കുവെച്ചിട്ടുണ്ട്. കഴിഞ്ഞ തവണ വോട്ട് എണ്ണിത്തീരും മുൻപ് തോൽവി സമ്മതിച്ച് ബൽറാം ഫേസ്ബുക്കിൽ പോസ്റ്റ് പങ്കുവെച്ചിരുന്നു. ഇക്കുറി വോട്ടെണ്ണൽ നാലാം റൗണ്ട് പൂർത്തിയായപ്പോൾ തന്നെ ബൽറാം ഫേസ്ബുക്കിൽ കം ബാക്ക് പോസ്റ്റ് പങ്കുവെക്കുകയായിരുന്നു. സെൽഫിയിൽ എംബി രാജേഷ് കണക്കുകൂട്ടുന്നതും കാണാൻ കഴിയും.
കഴിഞ്ഞ തവണ യു ഡി എഫിന്റെ കയ്യിൽ നിന്നും എം ബി രാജേഷ് പിടിച്ചെടുത്ത തൃത്താലയിലാണ് ഇത്തവണ വിടി ബൽറാം മുന്നിലായിരിക്കുന്നത്. എൽഡിഎഫിനുള്ളിലെ ആഭ്യന്തര പ്രശ്നങ്ങളും വിഭാഗീയതയും തൃത്താലയിൽ തങ്ങൾക്ക് ഗുണം ചെയ്യുമെന്നായിരുന്നു യു ഡി എഫിന്റെ വിലയിരുത്തൽ. മന്ത്രി എം ബി രാജേഷും മുൻ എം എൽ എ വി ടി ബൽറാമും തമ്മിൽ ശക്തമായ പോരാട്ടമാണ് തൃത്താലയിൽ കാണാനായത്.
