മുണ്ടക്കയം: മുണ്ടക്കയം, എരുമേലി ഭാഗങ്ങളില് പുറത്തു നിന്ന് മാലിന്യം കൊണ്ട് വന്ന് നിക്ഷേപിക്കുന്നതായി പരാതി. മുണ്ടക്കയം – എരുമേലി പാതയിലെ കണ്ണിമല തേക്കിന് കൂപ്പിന് സമീപത്തെ മുളങ്കാടുകളിലാണ് വന്തോതില് മാലിന്യം തള്ളിയിരിക്കുന്നത്. മുണ്ടക്കയം – കോരുത്തോട് പാതയിലെ വണ്ടന്പതാല് വനംവകുപ്പ് സ്റ്റേഷന് സമീപത്തെ തേക്ക് പ്ലാന്റേഷന്, മുണ്ടക്കയം – പറത്താനം റോഡിലെ വെട്ടുകല്ലാംകുഴി, പുത്തന്ചന്ത – മൈക്കോളജി റോഡിലെ ശ്മശാന ഭാഗം, മുണ്ടക്കയം ബൈപ്പാസ് റോഡിലെ മണിമലയാറിന്റെ തീരങ്ങള് എന്നിവിടങ്ങളിലും സമാനസ്ഥിതിയാണ്. പൈങ്ങനയില് നിന്ന് മുണ്ടക്കയം ബൈപ്പാസ് തുടങ്ങുന്ന പാലത്തിന് സമീപമാണ് ഇപ്പോള് സ്ഥിതി രൂക്ഷം. ശക്തമായ മഴ പെയ്താല് കൂടിക്കിടക്കുന്ന മാലിന്യം മണിമലയാറ്റിലെത്തിച്ചേരും. രാത്രികാലങ്ങളിലാണ് മാലിന്യനിക്ഷേപം കൂടുതല്.
