പത്തനംതിട്ട : വാട്ടര് അതോറിറ്റിയുടെ പൈപ്പ് സ്ഥാപിക്കാന് റോഡിന് കുറുകെ കുഴിച്ച കുഴികള് ശരിയായ രീതിയില് നികത്താത്തത് വാഹനയാത്രക്കാര്ക്ക് ഭീഷണിയാകുന്നു. കുമ്പഴ റോഡിലും അബാന് മേല്പാലത്തിന് സമീപത്തും ഉള്പ്പെടെ പല സ്ഥലങ്ങളിലും റോഡിന് കുറുകെ ഇത്തരത്തില് പൈപ്പ് സ്ഥാപിക്കാനായി നീളത്തില് കുഴികള് എടുത്തിരുന്നു. റോഡ് ടാറിംഗ് വെട്ടിപ്പൊളിച്ച് നിര്മ്മിച്ച ഈ കുഴികള് നികത്തി ടാറിംഗ് നടത്തുകയോ കോണ്ക്രീറ്റ് ചെയ്യുകയോ ആണ് സാധാരണ രീതിയില് ചെയ്യുന്നത്. എന്നാല് പൈപ്പ് സ്ഥാപിച്ച് കുഴിയുടെ മുകളില് പേരിന് മാത്രം മണ്ണിട്ട് കരാറുകാര് കടന്നുകളഞ്ഞതോടെ വാഹനങ്ങള് കയറി ഇറങ്ങി റോഡില് വലിയ കുഴികള് രൂപപ്പെട്ടു. രാത്രി സമയങ്ങളില് ഇരുചക്ര വാഹനയാത്രക്കാര് കുഴി ശ്രദ്ധിക്കാതെ അപകടത്തില്പ്പെടാനുള്ള സാധ്യത ഏറെയാണ്.
മാസങ്ങള്ക്ക് മുന്പ് നിര്മ്മിച്ച കുഴി ശരിയായ രീതിയില് മൂടാതെയിട്ടിരിക്കുന്നത് വാട്ടര് അതോറിറ്റിയുടെ തികഞ്ഞ അനാസ്ഥയാണെന്ന് യാത്രക്കാര് കുറ്റപ്പെടുത്തുന്നു. കാറുകള് ഉള്പ്പെടെ ഈ കുഴിയില് കയറിയിറങ്ങി പോകുന്നത് വാഹനങ്ങള്ക്ക് വലിയ തകരാറാണ് വരുത്തിവെക്കുന്നത്. കാറുകളുടെ അലൈന്മെന്റ് ഉള്പ്പെടെ തകരാറിലാകുവാന് ഇത് കാരണമാകും. പത്തനംതിട്ട നഗരത്തില് പലയിടത്തും മുന്പും ഇത്തരത്തില് കുഴികള് ശരിയായ രീതിയില് മൂടാതെ ഇട്ടിരുന്ന സംഭവങ്ങള് ഉണ്ടായിട്ടുണ്ട്. തുടര്ച്ചയായ പൈപ്പ് പൊട്ടല് കാരണം രൂപപ്പെടുന്ന കുഴികള് വേറെയും. എന്നിട്ടും ഇതൊന്നും കണ്ടില്ലെന്ന ഭാവം നടിക്കുകയാണ് കേരള വാട്ടര് അതോറിറ്റി.
