കൊച്ചി: ‘ഹിറ്റ് ‘ ആയി കൊച്ചി വാട്ടര്‍ മെട്രോ. ആദ്യ ദിനം തന്നെ യാത്ര ചെയ്തത് 6,559 പേരാണ്. തുടക്കത്തില്‍ തന്നെ മികച്ച പ്രതികരണമാണ് ജനങ്ങളില്‍നിന്ന് ജല മെട്രോയ്ക്കു ലഭിച്ചത്. ഹൈക്കോര്‍ട്ട് ടെര്‍മിനലില്‍ ഇന്നലെ വലിയ തിരക്ക് അനുഭവപ്പെട്ടു. വലിയ രീതിയിലുളള ടിക്കറ്റ് വരുമാനവും ഇതുവഴി ലഭിച്ചു. ടൂറിസ്റ്റുകള്‍ ഉള്‍പ്പെടെ ആദ്യ യാത്രിയിലുണ്ടായിരുന്നു. ആദ്യ ദിനത്തിലെ ടിക്കറ്റ് വില്‍പ്പന വഴി ലഭിച്ച വരുമാനം കെഎംആര്‍എല്‍ പുറത്തുവിട്ടിട്ടില്ല. വാട്ടര്‍ മെട്രോയില്‍ യാത്ര ചെയ്യുന്നതിനായുളള സ്മാര്‍ട്ട് കാര്‍ഡിന്റെ വിതരണം തുടങ്ങി.
ഹൈക്കോടതി-വൈപ്പിന്‍ റൂട്ടിലാണ് വാട്ടര്‍ മെട്രോ ആദ്യ സര്‍വ്വീസ് ആരംഭിച്ചത്. ഓരോ 15 മിനുട്ടിലും ബോട്ട് സര്‍വ്വീസ് ഉണ്ടാകും. 20 രൂപയാണ് ഹൈക്കോടതി-വൈപ്പിന്‍ റൂട്ടിലെ ടിക്കറ്റ് നിരക്ക്. 40 രൂപയാണ് കൂടിയ നിരക്ക്. മെട്രോ റെയിലിന് സമാനമായ എല്ലാ സൗകര്യങ്ങളോടും കൂടിയാണ് വാട്ടര്‍ മെട്രോ ടെര്‍മിനലുകളും ബോട്ടുകളും നിര്‍മ്മിച്ചിട്ടുള്ളത്.
