കൊല്ലം : ഓയൂര് വെളിയം മാവിള ജങ്ഷനില് പ്രവര്ത്തിക്കുന്ന പെട്രോള് പമ്പില് നിന്നും വാഹനങ്ങളില് നിറച്ച് നല്കിയത് വെള്ളം കലര്ന്ന പെട്രോള്. നിരവധി വാഹനങ്ങള് തകരാറിലായതായി പരാതി. പരാതികളും പ്രതിഷേധങ്ങളും വ്യാപകമായതിന് പിന്നാലെ പമ്പ് പോലീസ് അടപ്പിച്ചു.
കഴിഞ്ഞ ദിവസം ഈ പമ്പില് നിന്നും പെട്രോള് അടിച്ച നിരവധി വാഹനങ്ങള് യാത്രക്കിടയില് നിന്നുപോയിരുന്നു. തുടര്ന്ന് വാഹനങ്ങള് വര്ക്ക് ഷോപ്പുകളിലെത്തിച്ച് പരിശോധിച്ചപ്പോഴാണ് പെട്രോള് ടാങ്കില് വെള്ളം കണ്ടെത്തിയത്. എന്നാല് എവിടെ നിന്നാണ് വണ്ടിയുടെ ടാങ്കില് വെള്ളം കയറിയതെന്ന് മനസിലായിരുന്നില്ല.
വൈകിട്ട് ഒരു പോലീസ് ഉദ്യോഗസ്ഥനും ഈ പമ്പില് നിന്നും ബൈക്കില് പെട്രോള് അടിച്ചിരുന്നു. ഒരു കിലോമീറ്റര് പിന്നിടുന്നതിനു മുന്നേ വാഹനം നിന്നു. തുടര്ന്ന് നടത്തിയ പരിശോധനയിലാണ് പെട്രോളിനെക്കാള് കൂടുതല് വെള്ളമാണ് പമ്പില് നിന്ന് അടിച്ചതെന്ന് കണ്ടെത്തിയത്. അദ്ദേഹം പൂയപ്പള്ളി സ്റ്റേഷനില് അറിയിക്കുകയും തുടര്ന്ന് പോലീസെത്തി പമ്പ് അടപ്പിക്കുകയും ചെയ്തു.
