കോന്നി : പുനലൂർ മൂവാറ്റുപുഴ സംസ്ഥാന പാതയെയും കോന്നി പൂങ്കാവ് റോഡിനെയും തമ്മിൽ ബന്ധിപ്പിക്കുന്ന കോന്നി നഗരത്തിലെ പെട്രോൾ പമ്പിന് സമീപമുള്ള പഞ്ചായത്ത് റോഡിൽ മഴ വെള്ളം കെട്ടി നിൽക്കുന്നത് യാത്രക്കാർക്ക് ബുദ്ധിമുട്ട് സൃഷ്ടിക്കുന്നു.സംസ്ഥാന പാത നിർമ്മാണവുമായി ബന്ധപ്പെട്ട് ഓട നിർമ്മിച്ച ഭാഗം റോഡ് നിരപ്പിൽ നിന്നും ഉയർന്നപ്പോൾ മഴ വെള്ളം ഒഴുകി പോകാൻ സാധിക്കാതെ വന്നതാണ് വെള്ളം റോഡിൽ കെട്ടി നിൽക്കുവാൻ കാരണം.
നിരവധി ഇരുചക്ര വാഹനങ്ങളും കാൽനട യാത്രക്കാരും ഈവഴിയാണ് പൂങ്കാവ് റോഡിലേക്കും സംസ്ഥാന പാതയിലേക്കും വേഗത്തിൽ എത്തി ചേരുന്നത്.കോന്നിയിലെ സെൻട്രൽ ജംഗ്ഷനിൽ എത്താതെ താലൂക്ക് ആശുപത്രി, മിനി സിവിൽ സ്റ്റേഷനിലെ സർക്കാർ ഓഫീസുകൾ, ആനത്താവളം,മോട്ടോർ വെഹിക്കിൾ ഓഫീസ്,ആരാധനാലയങ്ങൾ നിരവധി ഓഫീസുകളിലേക്ക് പോകുന്നതിന് ഉള്ള എളുപ്പമാർഗം കൂടി ആണ് ഈ ഇട റോഡ്.പുനലൂർ മൂവാറ്റുപുഴ സംസ്ഥാന പാതക്ക് സമാനമായി ഈ റോഡും ഉയർത്തിയെങ്കിൽ മാത്രമേ പ്രശ്നത്തിന് പരിഹാരം കാണുവാൻ സാധിക്കുകയുള്ളൂ.
