വയനാട് : സർക്കാർ ടൗൺഷിപ്പിലെ ആദ്യഘട്ടത്തിൽ നിർമ്മിച്ച വീടുകളിൽ 19 എണ്ണം കൂടി ഇന്ന് ഗുണഭോക്താക്കൾക്ക് കൈമാറും. അന്തിമ ഗുണനിലവാര പരിശോധനകൾ പൂർത്തിയാക്കിയ ശേഷമാണ് രണ്ട് ക്ലസ്റ്ററുകളിലായി ഈ വീടുകൾ ദുരന്തബാധിതർക്ക് നൽകുന്നത്. ആദ്യഘട്ടത്തിൽ ആകെ ഉൾപ്പെട്ട 178 വീടുകളിൽ 140 എണ്ണവും അന്തിമ പരിശോധനയ്ക്കായി കിഫ്കോണിന് കൈമാറിയതായി നിർമ്മാണച്ചുമതലയുള്ള ഊരാളുങ്കൽ അധികൃതർ ഫേസ്ബുക്ക് പോസ്റ്റിലൂടെ അറിയിച്ചു. ബാക്കിയുള്ള വീടുകളും ഉടൻ തന്നെ കൈമാറുമെന്നും അവർ വ്യക്തമാക്കിയിട്ടുണ്ട്.
കിഫ്കോണിന്റെ അന്തിമ പരിശോധന കൂടി പൂർത്തിയാകുന്നതോടെ മാത്രമേ വീടുകൾ താമസയോഗ്യമാണെന്ന് ഉറപ്പുവരുത്തി ഗുണഭോക്താക്കൾക്ക് നൽകുകയുള്ളൂ. നിലവിൽ 178 വീടുകളിൽ 56 എണ്ണത്തിനാണ് രണ്ടാം ഘട്ട ഗുണനിലവാര പരിശോധന പൂർത്തിയായത്. ഇതിൽ അന്തിമ പരിശോധന കഴിഞ്ഞ ഏഴ് വീടുകൾ കഴിഞ്ഞ ദിവസം അധികൃതർ ഗുണഭോക്താക്കൾക്ക് കൈമാറിയിരുന്നു.
