കൊച്ചി : മലയാളസിനിമാ ലോക്കേഷനുകളില് ആഭ്യന്തരപരാതി പരിഹാര സെല് വേണമെന്നാവശ്യപ്പെട്ടുള്ള ഹര്ജിയില് ഇന്ന് ഹൈക്കോടതി വിധി പറയും. സിനിമയിലെ വനിതാപ്രവര്ത്തകരുടെ കൂട്ടായ്മയായ ഡബ്ല്യുസിസിയാണ് ഈ ആവശ്യം ഉന്നയിച്ച് ഹൈക്കോടതിയില് ഹര്ജി നല്കിയത്. നടി ആക്രമിക്കപ്പെട്ടതിന് പിറകേ 2018ലാണ് ഡബ്ല്യുസിസി ഇക്കാര്യമാവശ്യപ്പെട്ട് ഹൈക്കോടതിയെ സമീപിച്ചത്. വനിതാകൂട്ടായ്മയുടെ ഈ ആവശ്യം ന്യായമാണെന്ന് സംസ്ഥാനവനിതാ കമ്മീഷന് കോടതിയെ അറിയിച്ചിരുന്നു. കമ്മീഷനെ ഇക്കഴിഞ്ഞ ജനുവരി 31നാണ് ഹര്ജിയില് ഹൈക്കോടതി കക്ഷി ചേര്ത്തത്. ചീഫ് ജസ്റ്റിസ് അധ്യക്ഷനായ ഡിവിഷന് ബഞ്ചാണ് ഹര്ജിയില് ഉത്തരവ് പറയുക.
അതേസമയം, മലയാളസിനിമാ രംഗത്ത് സ്ത്രീകളുടെ സുരക്ഷ ഉറപ്പാക്കാന് നിയമനിര്മ്മാണം വേണമെന്ന ആവശ്യം ന്യായമാണെന്ന് ഇന്നലെ സാംസ്കാരികവകുപ്പ് മന്ത്രി സജി ചെറിയാന് വ്യക്തമാക്കിയിരുന്നു. അടൂര് ഗോപാലകൃഷ്ണന് കമ്മിറ്റി റിപ്പോര്ട്ടും, ജസ്റ്റിസ് ഹേമ കമ്മിറ്റി റിപ്പോര്ട്ടും ഉടനടി പഠിച്ച് നിയമനിര്മ്മാണമുണ്ടാകും. വല്ലാത്ത ചൂഷണമാണ് പലപ്പോഴും സിനിമാരംഗത്ത് സ്ത്രീകള്ക്ക് നേരിടേണ്ടി വരുന്നതെന്നും ഇതിനെ നേരിടാന് നിയമനിര്മ്മാണം അത്യാവശ്യമാണെന്നും സജി ചെറിയാന് വ്യക്തമാക്കുന്നു.
