ആലപ്പുഴ : മത്സ്യബന്ധനത്തിനിടെ ശക്തമായ കാറ്റിനെ തുടര്ന്നുണ്ടായ തിരയില്പ്പെട്ട് വള്ളം മറിഞ്ഞ് തൊഴിലാളികള് കടലില് വീണു. കോമന പുതുവല് അനിയന്കുഞ്ഞിന്റെ ഉടമസ്ഥതയിലുള്ള കട്ടക്കുഴി എന്ന ഫൈബര് വള്ളമാണ് അപകടത്തില്പ്പെട്ടത്. അപകടത്തില് ഇവരുടെ വള്ളവും വലയും മറ്റ് ഉപകരണങ്ങളും തകര്ന്നു. 20 ഓളം തൊഴിലാളികള് വള്ളത്തില് ഉണ്ടായിരുന്നു. ഇവര്ക്ക് ആര്ക്കും പരിക്കേറ്റതായി റിപ്പോര്ട്ടില്ല.
മത്സ്യ ബന്ധനത്തിന് ശേഷം തിരികെ വരുന്നതിനിടെ വളഞ്ഞ വഴി പടിഞ്ഞാറ് അഞ്ച് നോട്ടിക്കല് മൈല് അകലെ വെച്ച് ശക്തമായ തിരയില്പ്പെട്ട് വള്ളം മറിയുകയായിരുന്നു. കടലില് വീണ തൊഴിലാളികളെ കോസ്റ്റ് ഗാര്ഡാണ് രക്ഷപെടുത്തിയത്. വള്ളം മറിഞ്ഞതോടെ വലയിലുണ്ടായിരുന്ന മീനും നഷ്ടപ്പെട്ടു. വലയും ഉപയോഗ ശൂന്യമായി. ഒരുലക്ഷം രൂപയുടെ അടുത്ത് നാശനഷ്ടമുണ്ടായെന്നാണ് വിലയിരുത്തല്.
