മുംബൈ : കോവിഡിന്റെ ഏറ്റവും പുതിയ വകഭേദമായ ‘ഒമിക്രോണ് ‘കേസുകളുടെ എണ്ണം വര്ധിച്ചതോടെ മുംബൈയില് നിരോധനാജ്ഞ പ്രഖ്യാപിച്ചു. ശനി, ഞായര് ദിവസങ്ങളിലാണ് നിരോധനാജ്ഞ. റാലികള്ക്കും ആളുകള് കൂട്ടം കൂടുന്നതിനും കര്ശന നിയന്ത്രണം ഏര്പ്പെടുത്തിയിട്ടുണ്ട്. മഹാരാഷ്ട്രയില് മാത്രം 17 പേര്ക്കാണ് ഇതുവരെ ഒമിക്രോണ് റിപ്പോര്ട്ട് ചെയ്തത്. കഴിഞ്ഞ ദിവസം മഹാരാഷ്ട്രയില് മൂന്ന് വയസുകാരിക്ക് ഉള്പ്പടെ ഏഴ് പേര്ക്ക് ഒമിക്രോണ് സ്ഥിരീകരിച്ചിരുന്നു. മുംബൈയില് മൂന്ന് പേര്ക്കും പിംപിരി ചിന്വാദ് മുന്സിപ്പല് കോര്പ്പറേഷന് പരിധിയില് നാല് പേര്ക്കുമാണ് പുതിയ വകഭേദം സ്ഥിരീകരിച്ചത്. മുംബൈയിലെ മൂന്ന് രോഗികളും 48, 25, 37 വയസ് പ്രായമുള്ള പുരുഷന്മാരാണ്.
ദക്ഷിണാഫ്രിക്ക, ടാന്സാനിയ, യു.കെ എന്നിവിടങ്ങളില് നിന്നും എത്തിയവരാണിവര്. പിംപിരി ചിന്വാദ് മുന്സിപ്പല് കോര്പ്പറേഷന് പരിധിയില് രോഗം ബാധിച്ചവര് നേരത്തെ ഒമിക്രോണ് സ്ഥിരീകരിച്ച നൈജീരിയന് സ്ത്രീയുടെ സമ്ബര്ക്കപട്ടികയില് വരുന്നവരാണ്. അതെ സമയം ഏഴ് രോഗികളില് നാല് പേര് രണ്ട് ഡോസ് വാക്സിനും ഒരാള് ഒറ്റ ഡോസ് വാക്സിനും സ്വീകരിച്ചു. ഒരാള് വാക്സിന് സ്വീകരിച്ചിട്ടില്ല. ഇതില് നാല് പേര്ക്ക് രോഗലക്ഷണങ്ങളുണ്ട്. ഇതിനിടെ സിംബാബ്വെയില് നിന്ന് ഡല്ഹിയിലെത്തിയ ഒരാള്ക്ക് കൂടി ഒമിക്രോണ് സ്ഥിരീകരിച്ചു. ഇതോടെ ഡല്ഹിയില് റിപ്പോര്ട്ട് ചെയ്ത രോഗികളുടെ എണ്ണം 2 ആയി.
