ഇന്ത്യയിൽ ഏറ്റവും കൂടുതൽ ഉപയോക്താക്കളുള്ള മെസേജിങ് ആപ്പാണ് വാട്സ്ആപ്പ്. ഈ അടുത്തിടെയായി നിരവധി അപ്ഡേറ്റുകളും വാട്ആപ്പിൽ നടത്തിയിട്ടുണ്ട്. ഇതിൽ പലതും ഉപയോക്താക്കളുടെ സുരക്ഷ വർധിപ്പിക്കാൻ വേണ്ടി നടത്തിയിട്ടുള്ളതാണ്. നേരത്തെ വാട്സ്ആപ്പ് ചാറ്റുകൾക്കെല്ലാം പരിധി ഇല്ലാത്ത ബാക്കപ്പ് സ്റ്റോറേജ് കമ്പനി വാഗ്ദാനം ചെയ്തിരുന്നു. അതിനാൽ തന്നെ എത്ര പഴയ ചാറ്റുകളും ഉപയോക്താക്കൾക്ക് കണ്ടെത്താമായിരുന്നു. എന്നാൽ ഇനി മുതൽ ഇത് സാധ്യമാകില്ല. ചാറ്റുകളുടെ ബാക്കപ്പ് സ്റ്റോറേജിന് കമ്പനി പരിധി നിശ്ചയിക്കാൻ പോകുകയാണ്. വാട്സ്ആപ്പും ഗൂഗിളും ചേർന്നായിരിക്കും ഈ പദ്ധതി നടപ്പിലാക്കുക. ആൻഡ്രോയിഡ് 2.23.24.21 അപ്ഡേറ്റിൽ ആയിരിക്കും ഈ മാറ്റം. വാട്സ്ആപ്പിന്റെ ഐഒഎസ് പതിപ്പിലും ഈ മാറ്റം ഉണ്ടായിരിക്കും. ഈ അപ്ഡേറ്റ് വന്നുകഴിഞ്ഞാൽ 15 ജിബി മാത്രം ആയിരിക്കും ഉപയോക്താക്കളുടെ സൗജന്യ സ്റ്റോറേജ് അളവ്. നിലവിൽ ചില വാട്സ്ആപ്പ് ഉപയോക്താക്കൾക്ക് ഇതുമായി ബന്ധപ്പെട്ട അറിയിപ്പുകൾ ലഭിച്ചു തുടങ്ങി. അധികം വൈകാതെ തന്നെ എല്ലാ ഉപയോക്താക്കൾക്കും ഇത്തരത്തിലുള്ള അറിയിപ്പ് വാട്സ്ആപ്പിന്റെ ഭാഗത്തുനിന്ന് ലഭിക്കുന്നതായിരിക്കും. വാട്സ്ആപ്പിന്റെ ഇൻ-അലേർട്ട് സംവിധാനം വഴിയായിരിക്കും ഈ അറിയിപ്പുകൾ ഉപയോക്താക്കൾക്ക് ലഭിക്കുക. അതേസമയം നേരത്തെ സൂചിപ്പിച്ചതുപോലെ സൗജന്യമായി ഉപയോഗിക്കാവുന്ന സ്റ്റോറേജിന്റെ അളവാണ് 15 ജിബി.
നിങ്ങൾക്ക് ഗൂഗിൾ വൺ വഴി അധിക സ്റ്റോറേജ് വാങ്ങിക്കഴിഞ്ഞാൽ ഈ അധിക സ്റ്റോറേജ് വാട്സ്ആപ്പിന്റെ മെസേജ് ബാക്കപ്പിനായി ഉപയോഗിക്കാൻ സാധിക്കുന്നതായിരിക്കും. ഇത്തരത്തിൽ 100 ജിബി സ്റ്റോറേജ് ഗൂഗിൾ വണിൽ നിന്ന് വാങ്ങുന്നതിനായി 1.99 ഡോളറാണ് ചിലവ്. അതായത് ഇന്ത്യൻ രൂപയിൽ ഏകദേശം 165 രൂപ മാത്രം. ഇത്തരത്തിൽ സ്റ്റോറേജ് അധികം ആവശ്യമായി വരുന്ന ഉപയോക്താക്കൾക്ക് ഗൂഗിൾ വണ്ണില് നിന്ന് അധിക സ്റ്റോറേജ് വാങ്ങാവുന്നതാണ്. അതേ സമയം നേരത്തെ ജോലിയുടെ ഭാഗമായോ പഠനത്തിന്റെ ഭാഗമായോ വർക്ക്സ്പെയ്സ് സബ്സ്ക്രിപ്ഷൻ ചെയ്തിരിക്കുന്ന ഉപയോക്താക്കളെ വാട്സപ്പിന്റെ പുതിയ മാറ്റം ബാധിക്കില്ലെന്നും അറിയിച്ചിട്ടുണ്ട്. വാട്സ്ആപ്പിൽ ഇപ്പോൾ പല വീഡിയോകളും ചിത്രങ്ങളും എച്ച്ഡി ഫോർമാറ്റിൽ അയയ്ക്കാൻ സാധിക്കുന്നതാണ്. ഇത്തരം ഫയലുകൾക്ക് താരതമ്യേന സൈസും കൂടുതൽ ആയിരിക്കും. ഇത്തരത്തിൽ നോക്കുമ്പോൾ വളരെ വേഗത്തിൽ തന്നെ സൗജന്യമായി ലഭിക്കുന്ന 15 ജിബി തികയാതെ വരാനുള്ള സാധ്യതയുണ്ട്.
