തെന്നിന്ത്യൻ സൂപ്പർ താരം സാമന്തയുടെ കരിയറിൽ എക്കാലവും ഓർമിക്കാവുന്ന പെർഫോമൻസാണ് പുഷ്പയിലേത്. ചിത്രം പുറത്തിറങ്ങിയിട്ട് ഒരു വർഷം കഴിഞ്ഞെങ്കിലും ഇപ്പോഴും ”ഊ അണ്ടാവാ” എന്ന ഗാനവും സാമന്തയും വാർത്തകളിൽ ഇടം പിടിക്കാറുണ്ട്. ഇപ്പോഴിതാ, താൻ ഏത് സാഹചര്യത്തിലാണ് ഈ അതിഥിവേഷത്തിൽ അഭിനയിച്ചതെന്ന് വെളിപ്പെടുത്തിയിരിക്കുകയാണ് സാമന്ത. ഈ ഗാനരംഗത്തിൽ അഭിനയിക്കുന്നത് തന്റെ കുടുംബാംഗങ്ങള്ക്കും സുഹൃത്തുക്കള്ക്കും അഭ്യുദയകാംക്ഷികള്ക്കും ഇഷ്ടമല്ലായിരുന്നെന്ന് സാമന്ത പറഞ്ഞു. എല്ലാവരും പറഞ്ഞത് വീട്ടിൽ അടങ്ങി ഇരിക്കാനാണ്.
പക്ഷേ ചെയ്യും എന്നായിരുന്നു തനെടുത്ത നിലപാടെന്നും താരം വ്യക്തമാക്കി. സാമന്തയുടെ പുതിയ ചിത്രമായ ശാകുന്തളത്തിന്റെ പ്രചരണത്തിന്റെ ഭാഗമായുള്ള അഭിമുഖത്തിലാണ് ഇക്കാര്യം വെളിപ്പെടുത്തിയത്. ‘പുഷ്പയിലെ ഗാനം അവതരിപ്പിക്കാനുള്ള ഓഫര് വന്നത് വിവാഹമോചനത്തിന്റെ തയ്യാറെടുപ്പുകള്ക്കിടയിലായിരുന്നു. വിവാഹമോചനം ഔദ്യോഗികമായി പ്രഖ്യാപിച്ചപ്പോള് എല്ലാവരും പറഞ്ഞത് വീട്ടിലിരിക്കാനും ഇങ്ങനെയൊരു പാട്ടിനുവേണ്ടി നൃത്തം ചെയ്യരുത് എന്നുമായിരുന്നു. വെല്ലുവിളികളെ അതിജീവിക്കാന് പ്രോത്സാഹിപ്പിക്കുന്ന സുഹൃത്തുക്കള് വരെ ഇക്കാര്യമാണ് ആവശ്യപ്പെട്ടത്. പക്ഷേ ചെയ്യും എന്നായിരുന്നു എന്റെ നിലപാട്.’-സാമന്ത പറഞ്ഞു
