പത്തനംതിട്ട : സാധാരണക്കാര്ക്ക് ആശ്രയമാകേണ്ട പത്തനംതിട്ട ജനറല് ആശുപത്രിയിലെ ബ്ലഡ് ബാങ്കില് രക്തപരിശോധനയ്ക്ക് കൂടുതല് പണം വാങ്ങുന്നതായി പരാതി. രോഗികള്ക്ക് രക്തം ദാനം ചെയ്യുന്നതിന് മുന്നോടിയായി നടത്തുന്ന പരിശോധനകള്ക്കാണ് ദാതാക്കളില് നിന്നും പണം വാങ്ങുന്നതായി വ്യാപക പരാതി ഉയര്ന്നിരിക്കുന്നത്. പി.ആര്.പി.സി, പ്ലേറ്റ് ലെറ്റ് കൗണ്ട്, ക്രോസ് മാച്ച് തുടങ്ങിയവയാണ് രക്ത ദാനത്തിനായി നടത്തുന്ന പ്രധാന പരിശോധനകള്. ഇതില് പി.ആര്.പി.സി പരിശോധനയ്ക്ക് ബി.പി.എല് റേഷന് കാര്ഡ് ഉടമകള്ക്ക് സൗജന്യമായും എ.പി.എല് കാര്ഡ് ഉടമകള്ക്ക് 500 രൂപ നിരക്കിലുമാണ് പരിശോധന നടത്തിയിരുന്നത്. എന്നാല് ബി.പി.എല് റേഷന് കാര്ഡ് ഉടമകള്ക്ക് സൗജന്യമായി നടത്തിയിരുന്ന പരിശോധന ഇപ്പോള് ഇവരില് നിന്നും 300 രൂപ വാങ്ങിയാണ് നടത്തുന്നത്.
ക്രോസ് മാച്ചിംഗ് പരിശോധന എ.പി.എല്, ബി.പി.എല് കാര്ഡ് ഉടമകള്ക്ക് സൗജന്യമായി നടത്തിയിരുന്നത് 100 രൂപയാക്കുകയും ചെയ്തു. ഈ പരിശോധനകള്ക്കെല്ലാം ആവശ്യമായ കിറ്റുകളും പരിശോധന സാമഗ്രികളും സര്ക്കാര് സൗജന്യമായി സംസ്ഥാനത്തെ സര്ക്കാര് ആശുപത്രികളിലേക്ക് നല്കുമ്പോഴാണ് ഈ പകല്കൊള്ള നടക്കുന്നത്. രക്തദാനം മഹാദാനം എന്ന് പറയുമ്പോഴും മറ്റൊരാളുടെ ജീവന് രക്ഷിക്കാന് രക്തം നല്കാന് എത്തുന്നവരോടാണ് ജനറല് ആശുപത്രി അധികൃതര് ഇത്തരത്തില് പണം വാങ്ങുന്നത്. ഇത്തരത്തില് കൂടുതല് പണം വാങ്ങുമ്പോള് രക്തം നല്കാന് സന്നദ്ധരായി എത്തുന്നവര് പോലും ഇതിന് മടിക്കുകയാണ്.
