കൊല്ലം: കൊല്ലത്ത് വ്യാപക ക്ഷേത്ര കവര്ച്ച. ഒരു മാസത്തിനിടെ മോഷണം നടന്നത് അഞ്ചിലധികം ക്ഷേത്രങ്ങളില്. ഇരവിപുരം ആലുംമൂട് ശിവക്ഷേത്രം, ചെട്ടിനട ക്ഷേത്രം എന്നിവിടങ്ങളിലും കഴിഞ്ഞ ഒരാഴ്ചയ്ക്കിടെ മോഷണങ്ങള് നടന്നു . ഏറ്റവും ഒടുവില് മോഷണം നടന്നത് താമരക്കുളം ചിറ്റടീശ്വരം ക്ഷേത്രത്തില്. ഭണ്ഡാരത്തില് നിന്ന് കവര്ന്നത് മൂന്ന് ലക്ഷത്തോളം രൂപ. കഴിഞ്ഞ ദിവസം രാത്രിയാണ് മോഷണം നടന്നതെന്ന് കരുതുന്നു.
ഇരവിപുരം കേന്ദ്രീകരിച്ചാണ് മോഷണങ്ങളില് അധികവും. തെരഞ്ഞെടുപ്പ് സമയത്ത് വിവിധ പാര്ട്ടികളുടെ പ്രവര്ത്തകര് രാത്രികാലങ്ങളില് പോസ്റ്റര് പതിക്കുന്നതിനും മറ്റുമായി പൊതു നിരത്തുകളില് സജീവമായിരുന്നു. അതുകൊണ്ടു തന്നെ അസമയത്ത് ആരെയെങ്കിലും കണ്ടാല് നാട്ടുകാര്ക്ക് അസ്വാഭാവികത തോന്നിയിരുന്നില്ല. ഈ ഒരു അവസരം മറയാക്കി മോഷണങ്ങള് നടത്തിയെന്നാണ് പോലീസ് കരുതുന്നത്. തിരുട്ടുഗ്രാമത്തില് നിന്നുള്ള സംഘം മോഷണത്തിന് പിന്നിലുണ്ടെന്ന സംശയവുമുണ്ട്.