കോഴിക്കോട്: ഭാര്യയെയും കുഞ്ഞിനെയും കൊലപ്പെടുത്തിയ കേസില്‍ പ്രതിയുടെ ജാമ്യം റദ്ദാക്കാനാവശ്യപ്പെട്ട് പോലീസ് കോടതിയില്‍ റിപ്പോര്‍ട്ട് നല്‍കും. മടപ്പള്ളി സ്വദേശി മാളിയേക്കല്‍ സി.കെ. അബ്ദുല്‍ ബഷീറിനെതിരെയാണ് (49) കുന്ദമംഗലം പോലീസ് കോടതിയെ സമീപിക്കുക. ജാമ്യക്കാലയളവില്‍ മറ്റു കുറ്റകൃത്യങ്ങളില്‍ ഉള്‍പ്പെടരുത്, അന്വേഷണ ഉദ്യോഗസ്ഥന്‍ ആവശ്യപ്പെടുമ്പോള്‍ ഹാജരാകണം തുടങ്ങിയ ജാമ്യവ്യവസ്ഥയിലെ നിബന്ധനകള്‍ പ്രതി ലംഘിച്ചെന്നുകാട്ടിയാണ് റിപ്പോര്‍ട്ട് നല്‍കുക. ഇപ്പോള്‍ കവര്‍ച്ചക്കേസില്‍ അറസ്റ്റിലായ പ്രതി വീണ്ടും ജാമ്യത്തിലിറങ്ങി ഒളിവില്‍ പോകാനുള്ള സാധ്യതയും പോലീസ് ചൂണ്ടിക്കാട്ടും.
കൊലക്കേസില്‍ വിചാരണക്കുമുമ്പേ ജാമ്യത്തിലിറിങ്ങിയ ബഷീര്‍ 2019 ഡിസംബര്‍ 19ന് സൗത്ത് ബീച്ചിലെ പള്ളിയിയില്‍ നിന്ന് മടങ്ങുകയായിരുന്ന ഭിന്നശേഷിക്കാരനെ കബളിപ്പിച്ച്‌ മുച്ചക്രവാഹനം തട്ടിയെടുക്കുകയായിരുന്നു. വാഹനത്തില്‍ വെച്ചുമറന്ന മൊബൈല്‍ ഫോണ്‍ കേന്ദ്രീകരിച്ചുള്ള അന്വേഷണത്തിലാണ് ഭിന്നശേഷിക്കാരനായ ബഷീറിനെ വെള്ളിയാഴ്ച ടൗണ്‍ പോലീസ് അറസ്റ്റുചെയ്തത്. കൊലക്കേസ് പ്രതി ജാമ്യത്തിലിറങ്ങി വീണ്ടും കേസിലുള്‍പ്പെട്ടത് സംബന്ധിച്ച്‌ ടൗണ്‍ പോലീസ് നേരത്തേ കുന്ദമംഗലം പൊലീസിന് റിപ്പോര്‍ട്ട് നല്‍കിയിരുന്നു. ഈ റിപ്പോര്‍ട്ടും എഫ്.ഐ .ആറും ഹാജരാക്കിയാണ് കോടതിയില്‍ ജാമ്യം റദ്ദാക്കാനാവശ്യപ്പെടുക.
2017ലാണ് ഭാര്യ ഷാഹിദ, ഒന്നരവയസ്സുള്ള മകള്‍ ഖദീജത്തുല്‍ മിസ്രിയ്യ എന്നിവരെ കുന്ദമംഗലം പിലാശ്ശേരിയിലെ വീട്ടില്‍വെച്ച്‌ ബഷീര്‍ ശ്വാസം മുട്ടിച്ച്‌ കൊലപ്പെടുത്തിയത്. ഭാര്യയുടെ മൃതദേഹം കളരിക്കണ്ടിയിലെ ആലുംതോട്ടത്തില്‍ വീട്ടിലും കുഞ്ഞിന്റെ മൃതദേഹം അരയിടത്തുപാലത്തിനടുത്ത് കനോലി കനാലില്‍ നിന്നുമാണ് കണ്ടെത്തിയത്.
ഭാര്യയെക്കുറിച്ചുള്ള സംശയമാണ് കൊലയ്ക്കു കാരണമായതെന്ന് ചൂണ്ടിക്കാട്ടി അന്വേഷണസംഘം കുന്ദമംഗലം കോടതയില്‍ സമര്‍പ്പിച്ച കുറ്റപത്രത്തില്‍ വിചാരണ ആരംഭിക്കാനിരിക്കെയാണ് ബഷീര്‍ കവര്‍ച്ചക്കേസില്‍ അറസ്റ്റിലായത്.
