തെലങ്കാന : ദിവസവും പല പ്രശ്നങ്ങളുമായും പോലീസ് സ്റ്റേഷനിലേക്ക് ആളുകള് ഫോണ് വിളിക്കുന്നത് പതിവാണ്. എന്നാല് നിസാരകാര്യങ്ങള്ക്കായാലോ ഈ വിളി? ആറ് തവണ തുടര്ച്ചയായി പോലീസ് സ്റ്റേഷനിലേക്ക് ഫോണ് വിളിച്ച യുവാവിനെ ഒടുവില് പോലീസ് കസ്റ്റഡിയിലെടുത്തു. യുവാവ് പോലീസ് സ്റ്റേഷനിലേക്ക് വിളിച്ചതാകട്ടെ ഭാര്യ മട്ടണ് കറി വച്ചുതന്നില്ലെന്ന് പരാതി പറയാന്.
ഹോളി ദിനത്തില് തെലങ്കാനയിലെ നല്ഗൊണ്ട ജില്ലയിലാണ് സംഭവം. നവീന് എന്ന യുവാവാണ് മട്ടണ് തയ്യാറാക്കി നല്കാത്തതിന് പരാതി പറയാന് ആറ് തവണ പോലീസിനെ വിളിച്ചത്. ഇയാള് മദ്യലഹരിയിലായിരുന്നെന്ന് പോലീസ് പറഞ്ഞു. ആദ്യ കോള് വന്നപ്പോള് ഇയാള് തമാശയ്ക്ക് ഒപ്പിച്ചതാണെന്ന് കരുതിയ പോലീസ് തുടര്ച്ചയായി കോളുകള് വന്നതോടെ മേലുദ്യോഗസ്ഥരുമായി ബന്ധപ്പെടുകയും നടപടിയെടുക്കുകയുമായിരുന്നു. ഐപിസി സെക്ഷന് 290, സെക്ഷന് 510 എന്നീ വകുപ്പുകളാണ് യുവാവിനെതിരെ ചുമത്തിയത്.
