കോഴിക്കോട് : കൃഷി നാശമുണ്ടാക്കുന്ന കാട്ടുപന്നികളെ വെടിവയ്ക്കാന് അനുമതി നല്കുന്നതിനുള്ള അധികാരം പഞ്ചായത്ത് പ്രസിഡന്റുമാര്ക്കും നല്കാന് ആലോചന. നിലവില് വൈല്ഡ് ലൈഫ് വാര്ഡനും വനം വകുപ്പിലെ ഉന്നത ഉദ്യോഗസ്ഥര്ക്കുമുള്ള അധികാരം കൂടുതല് വികേന്ദ്രീകരിക്കുന്നതിന്റെ ഭാഗമായാണ് നടപടി. തദ്ദേശ – വനം സെക്രട്ടറി തല ചര്ച്ചകളെ തുടര്ന്ന് നിയമവശങ്ങള് പരിശോധിക്കാന് സര്ക്കാര് തീരുമാനിച്ചു. രണ്ടു വകുപ്പുകളുടെ കൂട്ടായ തീരുമാനം വേണമെന്നതിനാല് മുഖ്യമന്ത്രി പിണറായി വിജയന് ചികിത്സ കഴിഞ്ഞ് തിരിച്ചെത്തിയ ശേഷമായിരിക്കും തുടര് നടപടികള്.
കൃഷി നാശം ഉണ്ടാക്കുന്ന കാട്ടു പന്നികളെ വെടിവച്ചു കൊല്ലാനുള്ള അനുമതി ഒരു വര്ഷത്തേക്ക് നീട്ടി നല്കി കഴിഞ്ഞ ദിവസം വനം വകുപ്പ് ഉത്തരവ് ഇറക്കിയിരുന്നു. ഇതിന്റെ തുടര്ച്ചയായിട്ടാണ് നടപടികള് ലഘൂകരിക്കാനും ചര്ച്ചകള് ആരംഭിച്ചത്. കാട്ടു പന്നികളെ ‘വെര്മിന്’ ആയി പ്രഖ്യാപിക്കുന്നതില് കേന്ദ്ര വനം പരിസ്ഥിതി മന്ത്രാലയത്തില് നിന്ന് അനുകൂല നിലപാട് അടുത്ത കാലത്തൊന്നും ഉണ്ടായേക്കില്ല എന്ന സൂചനയും സര്ക്കാരിന് ലഭിച്ചിട്ടുണ്ട്. സെക്രട്ടേറിയറ്റ് വളയലിലേക്ക് ഉള്പ്പെടെ നീങ്ങുന്ന കര്ഷക പ്രതിഷേധം തണുപ്പിക്കാന് സംസ്ഥാന തലത്തില് തന്നെ നടപടികള് സ്വീകരിക്കുന്നതിന്റെ ഭാഗമാണ് ഇപ്പോഴത്തെ ചര്ച്ചകള്.
