കോന്നി : വേനല് കടുത്തതോടെ തണ്ണിത്തോട് റോഡില് കാട്ടാനയും കാട്ടുപോത്തും റോഡ് മുറിച്ചു കടന്ന് കല്ലാറില് വെള്ളം കുടിക്കുവാന് എത്തുന്നത് പതിവാകുന്നു. വൈകിട്ട് മൂന്ന് മണിയോടെ ആണ് തണ്ണിത്തോട് റോഡില് പേരുവാലിയിലെ ഇന്റര്ലോക്ക് കട്ടകള് മറികടന്നെത്തിയ കാട്ടാന കാട്ടിലേക്ക് മറഞ്ഞത്. കഴിഞ്ഞ ദിവസം കാട്ടാന ഏറെനേരം കല്ലാറ്റില് നിലയുറപ്പിച്ചത് ആളുകള്ക്ക് കൗതുകകാഴ്ചയായിരുന്നു. വന്യ മൃഗങ്ങള് റോഡിലേക്ക് ഇറങ്ങുന്നത് കൗതുകം ജനിപ്പിക്കുന്നുണ്ട് എങ്കിലും രാത്രിയിലാണ് ഏറെ അപകടം. റോഡില് സ്ട്രീറ്റ് ലൈറ്റുകള് സ്ഥാപിച്ചിട്ടുണ്ട് എങ്കിലും ഇവ പലപ്പോഴും പ്രകാശിക്കാതെ വരുന്നതാണ് ഏറ്റവും അപകടകരമാകുന്നത്.
ആനയും കാട്ടുപോത്തുകളും റോഡിലെ വളവുകളില് നിന്നാല് വെളിച്ച കുറവ് മൂലം തിരിച്ചറിയാന് സാധിക്കാത്തത് അപകടങ്ങള്ക്കും കാരണമാകും. തണ്ണിത്തോട്, ചിറ്റാര്, സീതത്തോട് ഭാഗങ്ങളിലേക്ക് എല്ലാം ആളുകള് യാത്ര ചെയ്യുന്ന പ്രധാന പാതയാണ് ഇത്. കാട്ടുപോത്തുകള്, മ്ലാവ്, ആന തുടങ്ങി നിരവധി വന്യ ജീവികള് റോഡ് മുറിച്ചു കടക്കുന്നുണ്ട്. പലയിടത്തും വനം വകുപ്പ് സൂചന ബോര്ഡുകള് സ്ഥാപിച്ചിട്ടുണ്ട് എങ്കിലും റോഡില് പലയിടത്തും വെളിച്ചകുറവ് യാത്രക്കാര്ക്ക് എന്നും ഭീഷണിയായി തുടരുന്നു.
