തിരുവനന്തപുരം : പങ്കാളിയെ ഭയപ്പെടുത്താൻ ഇൻസ്റ്റഗ്രാം പേജ് വഴി യുവതിയുടെ വ്യാജ ആത്മഹത്യാ ഭീഷണി. ഞരമ്പു മുറിച്ചെന്നു കാണിക്കാനായി കൈത്തണ്ടയിൽ യുവതി ടൊമാറ്റോ സോസ് പുരട്ടുകയായിരുന്നു. കരമന മേലാറന്നൂരാണു സംഭവം. ആത്മഹത്യാ ഭീഷണി സത്യമെന്നു ധരിച്ച് ഇൻസ്റ്റഗ്രാം മോണിറ്ററിങ് സെല്ല് പോലീസിനെ വിവരമറിയിക്കുകയായിരുന്നു. പിന്നീട് ഇരുവരെയും താക്കീതു നൽകി വിട്ടയച്ചു.
ആലപ്പുഴ സ്വദേശിയായ യുവതിയും നെയ്യാറ്റിൻകര സ്വദേശിയായ യുവാവും 3 വർഷമായി കരമനയിൽ ഒരുമിച്ചു താമസിക്കുകയാണ്. ഫോൺ എടുക്കാതെ പോയ യുവാവ് തിരിച്ചെത്താൻ വൈകിയതോടെയാണ് യുവതി ‘കടുംകൈ’ ചെയ്തത്. ഞരമ്പു മുറിച്ചെന്നു കാണിക്കാനായി കൈത്തണ്ടയിൽ ടൊമാറ്റോ സോസ് പുരട്ടി തെറ്റിദ്ധരിപ്പിക്കുകയായിരുന്നു. തെറ്റിദ്ധരിച്ച ഇൻസ്റ്റഗ്രാം അധികൃതർ കൊച്ചി സിറ്റി പോലീസിനു വിവരം കൈമാറി. സൈബർ സെല്ലിന്റെ സഹായത്തോടെ യുവതിയുടെ ലൊക്കേഷൻ കണ്ടെത്തിയ ശേഷം കൊച്ചി സിറ്റി പോലീസ് കരമന പോലീസിനെ വിവരമറിയിക്കുകയായിരുന്നു.
