വിശാഖപട്ടണം : പെൺകുട്ടികളോട് മോശമായി പെരുമാറിയയാളെ സ്ത്രീകൾ മർദിച്ചു. ആന്ധ്രപ്രദേശിലെ വിശാഖപട്ടണം മൽക്കാപുരം പോലീസ് സ്റ്റേഷൻ പരിധിയിലാണ് സംഭവം. നിരവധി ക്രിമിനൽ കേസുകളിൽ പ്രതിയായ ചിന്നറാവുവിനെയാണ് സ്ത്രീകൾ കൂട്ടത്തോടെ എത്തി നടുറോഡിലിട്ട് മർദിച്ചത്. ട്യൂഷൻ ക്ലാസിലേക്ക് പോവുകയായിരുന്ന പെൺകുട്ടികളോടാണ് ചിന്നറാവു മോശമായി പെരുമാറിയത്. പെൺകുട്ടികൾക്ക് ചോക്ലേറ്റ് നൽകാൻ ശ്രമിക്കുകയും ചെയ്തു. ചിന്നറാവുവിന്റെ പെരുമാറ്റത്തിൽ ഭയന്ന പെൺകുട്ടികൾ വിവരം മാതാപിതാക്കളെ അറിയിച്ചു. തുടർന്നാണ് പ്രദേശത്തെ സ്ത്രീകൾ സംഘടിച്ചെത്തി ചിന്നറാവുവിനെ കൈകാര്യം ചെയ്തത്.
പ്രദേശത്തെ മാർക്കറ്റിൽവെച്ചാണ് സ്ത്രീകൾ ഇയാളെ പിടികൂടിയത്. തുടർന്ന് സംഘം ചേർന്ന് മർദിക്കുകയും വസ്ത്രങ്ങൾ വലിച്ചുകീറുകയും ചെയ്തു. ഒടുവിൽ പോലീസെത്തിയാണ് ഇയാളെ രക്ഷിച്ചത്. ചിന്നറാവുവിനെ കസ്റ്റഡിയിലെടുക്കുകയും ചെയ്തു. നേരത്തെയും സമാനകേസുകളിൽ ഇയാൾ പ്രതിയായിട്ടുണ്ടെന്നാണ് പോലീസ് നൽകുന്നവിവരം.
