പാലക്കാട് : പരാതികളില് എതിര്കക്ഷികള് ഹാജരായില്ലെങ്കില് നടപടി എന്ന് വനിതാകമ്മീഷന്. പരാതികളില് തുടര്ച്ചയായി ആവശ്യപ്പെട്ടിട്ടും ഹാജരാവാതെ എതിര്കക്ഷികള് മാറിനില്ക്കുന്ന പ്രവണത വര്ധിക്കുന്നതായി വനിത കമീഷന് അധ്യക്ഷ പി.സതീദേവി. കുറ്റം ബോധ്യപ്പെട്ടാല് ഇവര്ക്കെതിരെ നടപടിയുണ്ടാകും. കലക്ടറേറ്റ് കോണ്ഫറന്സ് ഹാളില് സംഘടിപ്പിച്ച വനിത കമീഷന് അദാലത്തില് സംസാരിക്കുകയായിരുന്നു അവര്.
മറ്റുജില്ലകളെ അപേക്ഷിച്ച് ജില്ലയില് വനിതകള്ക്ക് എതിരെയുള്ള അതിക്രമങ്ങള് കുറവാണ്. അതിനാല് ലഭിക്കുന്ന കേസുകളുടെ എണ്ണത്തില് കുറവുണ്ട്. 2021 സെപ്റ്റംബര് വരെ 1470 പരാതികളാണ് കമീഷന് ലഭിച്ചത്. ഇതില് 1065 എണ്ണം പരിഹരിച്ചു. 405 എണ്ണമാണ് ബാക്കിയുള്ളത്. ഇതില് 75 പരാതികള് വെള്ളിയാഴ്ച പരിഗണിച്ചു. 18 പരാതികള് പരിഹരിച്ചിട്ടുണ്ട്. ഒരെണ്ണം പോലീസ് റിപ്പോര്ട്ടിനായി അയച്ചിട്ടുണ്ട്. ബാക്കിയുള്ളവ എതിര്കക്ഷികള് ഹാജരാകാത്തതിനെ തുടര്ന്ന് അടുത്ത സിറ്റിങ്ങിനായി മാറ്റിവെച്ചു.
അയല്വാസികള് തമ്മിലുള്ള തര്ക്കങ്ങള്, സ്ത്രീകളെ അസഭ്യം പറയല്, ഗാര്ഹിക പീഡനം, മുതിര്ന്നവരെ സംരക്ഷിക്കാത്തതുമായി ബന്ധപ്പെട്ട പ്രശ്നങ്ങള് എന്നിവയാണ് കമീഷന് പ്രധാനമായും പരിഗണിച്ചത്. കലക്ടറേറ്റ് കോണ്ഫറന്സ് ഹാളില് നടന്ന അദാലത്തില് അഡ്വക്കേറ്റുമാരായ കെ. രാധിക, രമിക, അഞ്ജന, കൗണ്സിലര്മാരായ ഡിംപിള്, സ്റ്റെഫി എന്നിവര് സംബന്ധിച്ചു.