കോന്നി : അരുവാപ്പുലം ഗ്രാമപഞ്ചായത്ത് പരിധിയില് നിന്നും ഹരിത കര്മ്മസേനയുടെ നേതൃത്വത്തില് വാതില്പടി ശേഖരണത്തിലൂടെ സംഭരിച്ച പ്ലാസ്റ്റിക്ക് അജൈവ മാലിന്യങ്ങള് നീക്കം ചെയ്യുന്ന നടപടികള് ആരംഭിച്ചു. കഴിഞ്ഞ ഏറെക്കാലമായി കല്ലേലി ടര്ഫ് കോര്ട്ടിനോട് ചേര്ന്ന് സ്ഥിതിചെയ്യുന്ന എം.സി.എഫിലും സമീപ പ്രദേശങ്ങളിലുമായി സംഭരിച്ചിരുന്ന മാലിന്യങ്ങളാണ് നീക്കം ചെയ്യുന്നത്. മാലിന്യ നീക്കത്തിനായി ക്ലീന് കേരള കമ്പനിയുമായി ഗ്രാമപഞ്ചായത്ത് കരാര് വെച്ചിരുന്നു. ക്ലീന് കേരള കമ്പനി കൃത്യമായും സമയബന്ധിതമായും നീക്കം ചെയ്യാത്തതിന തുടര്ന്ന് എം.സി.എഫിലും പരസരത്തും വലിയ മാലിന്യക്കൂമ്പാരം രൂപപ്പെട്ടിരുന്നു.
ഗ്രാമപഞ്ചായത്തിലെ എം.സി.എഫ് നിറഞ്ഞതിനാല് മിനി എം.സി.എഫുകളില് നിന്നും അജൈവ മാലിന്യം എത്തിക്കാന് കഴിയാത്ത സാഹചര്യവും ഉണ്ടായിരുന്നു. കരാര് വെച്ച കമ്പനി അധികൃതരോട് പലപ്രാവശ്യം നേരിട്ട് ബന്ധപ്പെട്ടിട്ടും മാലിന്യം നീക്കം ചെയ്യുന്നതിന് ആവശ്യമായ നടപടികള് സ്വീകരിച്ചിരുന്നില്ല. അരുവാപ്പുലം ഗ്രാമപഞ്ചായത്ത് പുതിയ ഭരണസമിതിയുടെ നേതൃത്വത്തില് ക്ലീന് കേരള കമ്പനിയുമായുള്ള കരാര് റദ്ദ് ചെയ്ത് പുതിയ കമ്പനിയുമായി കരാര് ഉണ്ടാക്കിയതിനെ തുടര്ന്നാണ് മാലിന്യ നീക്കം സാധ്യമായത്.
എം.സി.എഫിലെ മാലിന്യ നീക്കം പൂര്ത്തിയായതിന് ശേഷം 15 വാര്ഡുകളിലെ മിനി എം.സി.എഫുകളില് ശേഖരിച്ചിരിക്കുന്ന പ്ലാസ്റ്റിക് മാലിന്യങ്ങളും പൂര്ണ്ണമായി നീക്കം ചെയ്യുന്നതിനാണ് തീരുമാനിച്ചിരിക്കുന്നതെന്ന് ഗ്രാമപഞ്ചായത്ത് പ്രസിഡന്റ് ബി. രേഷ്മ അറിയിച്ചു. ഹരിത കര്മ്മസേന അംഗങ്ങളുടെ നേതൃത്വത്തിലാണ് മാലിന്യങ്ങള് നീക്കം ചെയ്യുന്നത്. ജില്ലാ പഞ്ചായത്ത് ഡിവിഷന് മെമ്പര് എസ്. സന്തോഷ് കുമാര്, പഞ്ചായത്ത് വൈസ് പ്രസിഡന്റ് ജി. ശ്രീകുമാര്, വികസന സ്റ്റാന്റിഗ് കമ്മറ്റി ചെയര്പേഴ്സണ് സ്മിത സന്തോഷ്, അരോഗ്യ വിദ്യാഭ്യാസ സ്റ്റാന്റിഗ് കമ്മറ്റി ചെയര്മാന് കെ.പി. തോമസ് എന്നിവര് എം.സി.എഫ്. സന്ദര്ശിച്ച് പ്ലാസ്റ്റിക് മാലിന്യ നീക്ക പ്രവര്ത്തനങ്ങള് വിലയിരുത്തി.
