ന്യൂയോര്ക്ക് : ലോകത്ത് കൊവിഡ് ബാധിതരുടെ എണ്ണം കുത്തനെ ഉയരുന്നു. വേള്ഡോമീറ്ററിന്റെ കണക്കുപ്രകാരം കഴിഞ്ഞ ഇരുപത്തിനാല് മണിക്കൂറിനിടെ അഞ്ച് ലക്ഷത്തിലധികം പേര്ക്കാണ് വൈറസ് ബാധ സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം പത്തൊന്പത് കോടി എണ്പത്തിയഞ്ച് ലക്ഷം പിന്നിട്ടു. മരണസംഖ്യ 42.32 ലക്ഷമായി ഉയര്ന്നു. പതിനേഴ് കോടി തൊണ്ണൂറ്റിരണ്ട് ലക്ഷം പേര് രോഗമുക്തി നേടി.
അമേരിക്കയില് കഴിഞ്ഞ ഇരുപത്തിനാല് മണിക്കൂറിനിടെ അരലക്ഷത്തിലധികം കേസുകളാണ് റിപ്പോര്ട്ട് ചെയ്തത്. ആകെ രോഗബാധിതരുടെ എണ്ണം മൂന്ന് കോടി അന്പത്തിയേഴ് ലക്ഷം കടന്നു. 6.29 ലക്ഷം പേര് മരിച്ചു. രണ്ട് കോടി തൊണ്ണൂറ്റിയാറ് ലക്ഷം പേര് രോഗമുക്തി നേടി.
ഇന്ത്യയില് കഴിഞ്ഞ 24 മണിക്കൂറിനിടെ 41,649 പേര്ക്കു കൂടി കോവിഡ് സ്ഥിരീകരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു. ഇതില് പകുതി കേസുകള് റിപ്പോര്ട്ട് ചെയ്തിരിക്കുന്നത് കേരളത്തില്നിന്നാണ്. വെള്ളിയാഴ്ച 20,772 പേര്ക്കാണ് സംസ്ഥാനത്ത് കോവിഡ് സ്ഥിരീകരിച്ചത്. കഴിഞ്ഞ 24 മണിക്കൂറിനിടെ 593 മരണവും സ്ഥിരീകരിച്ചിട്ടുണ്ട്. രാജ്യത്ത് കോവിഡ് ബാധിച്ചു മരിച്ചവരുടെ എണ്ണം ഇതോടെ 4,23,810 ആയിട്ടുണ്ട്. അതേസമയം കഴിഞ്ഞ 24 മണിക്കൂറിനിടെ 37,291 പേര് കൂടി രോഗമുക്തി നേടുകയും ചെയ്തു.