ബീജിംഗ് : ചൈനയില്‍ ആറ് പുതിയ കൊറോണ വൈറസ് കേസുകള്‍ റിപ്പോര്‍ട്ട് ചെയ്തു. ഇതില്‍ നാല് എണ്ണം ലക്ഷണമില്ലാത്ത അണുബാധകളാണ്. ആറ് പുതിയ കോവിഡ് രോഗികളില്‍ രണ്ടുപേര്‍ വിദേശത്ത് നിന്ന് വന്നതാണ്‌. വെള്ളിയാഴ്ച ഷാന്‍‌ഡോംഗ്, ഷാങ്ഹായ് എന്നിവിടങ്ങളില്‍ നിന്നാണ് ഈ കേസുകള്‍ റിപ്പോര്‍ട്ട് ചെയ്തത്. പുതിയ നാല് ലക്ഷണമില്ലാത്ത കേസുകളില്‍ മൂന്നെണ്ണം കൊറോണ വൈറസ് പ്രഭവകേന്ദ്രമായ വുഹാനില്‍ നിന്നാണ് റിപ്പോര്‍ട്ട് ചെയ്തത്.
വെള്ളിയാഴ്ച വരെ 396 അസിംപ്റ്റോമാറ്റിക് കേസുകളാണുള്ളത്. ഇതില്‍ 331 എണ്ണം വുഹാനില്‍ നിന്നാണെന്ന് എന്‍‌എച്ച്‌സി അറിയിച്ചു. എല്ലാ അസിംപ്റ്റോമാറ്റിക് രോഗികളും മെഡിക്കല്‍ നിരീക്ഷണത്തിലായിരുന്നു. പരിശോധനയില്‍ കോവിഡ് 19 പോസിറ്റീവായ ആളുകളെയാണ് അസിംപ്റ്റോമാറ്റിക് കേസുകള്‍ സൂചിപ്പിക്കുന്നത്, പക്ഷേ പനി, ചുമ, തൊണ്ടവേദന തുടങ്ങിയ ലക്ഷണങ്ങളൊന്നും ഇവര്‍ക്ക് ഉണ്ടാകില്ല. എന്നിരുന്നാലും അവരില്‍ നിന്ന് മറ്റുള്ളവരിലേക്ക് രോഗം പകരാന്‍ സാധ്യതയുണ്ട്. ചൈനയില്‍ സ്ഥിരീകരിച്ച കോവിഡ്-19 കേസുകളുടെ എണ്ണം ഇപ്പോള്‍ 82,999 ആണ്. മാരകമായ വൈറസ് ബാധിച്ചു രാജ്യത്ത് ഇതുവരെ 4,634 പേര്‍ മരിച്ചു.
