ബെംഗളൂരു: കര്‍ണാടക മുഖ്യമന്ത്രി ബി.എസ്. യെദ്യൂരപ്പയുടെ പൊളിറ്റിക്കല്‍ സെക്രട്ടറി ആത്മഹത്യയ്ക്ക് ശ്രമിച്ചു. എന്‍.ആര്‍. സന്തോഷാണ് ഉറക്കഗുളിക കഴിച്ച്‌ ആത്മഹത്യയ്ക്ക് ശ്രമിച്ചത്. വീട്ടിലായിരുന്ന അദ്ദേഹത്തെ ഉടന്‍ തന്നെ എം.എസ്. രാമയ്യ ആശുപത്രിയില്‍ പ്രവേശിപ്പിച്ചു.
എന്തുകൊണ്ടാണ് സന്തോഷ് ആത്മഹത്യയ്ക്ക് ശ്രമിച്ചതെന്ന് അറിയില്ലെന്നും അദ്ദേഹത്തെ ഡോക്ടര്‍മാര്‍ ചികിത്സിക്കുന്നുണ്ടെന്നും യെദ്യൂരപ്പ പ്രതികരിച്ചു. ‘അദ്ദേഹത്തിന്റെ കുടുംബവുമായി സംസാരിച്ചു. ഇതിന് പിന്നിലെ കാരണമെന്താണെന്ന് അറിയില്ല. അദ്ദേഹം ഇപ്പോള്‍ ആരോഗ്യവാനാണ്. ആശങ്കപ്പെടേണ്ടതൊന്നുമില്ല’ -യെദ്യൂരപ്പ വാര്‍ത്ത ഏജന്‍സിയായ എ.എന്‍.ഐയോട് പറഞ്ഞു.
യെദ്യൂരപ്പ സന്തോഷിനോട് സംസാരിച്ചിരുന്നു. ഉറക്കഗുളിക കഴിച്ചതിന്റെ ആലസ്യം അദ്ദേഹത്തിനുണ്ടായിരുന്നുവെന്നും ആത്മഹത്യയ്ക്ക് ശ്രമിച്ചതിന്റെ കാരണം അദ്ദേഹം തന്നെ വ്യക്തമാക്കുമെന്നും യെദ്യൂരപ്പ കൂട്ടിച്ചേര്‍ത്തു. സന്തോഷിന് വിഷാദ രോഗമുള്ളതായാണ് പ്രാഥമിക വിവരം. സംഭവത്തെക്കുറിച്ച്‌ ആശുപത്രി അധികൃതര്‍ ഇതുവരെ പ്രതികരിച്ചിട്ടില്ല.
ഈ വര്‍ഷം ആദ്യമാണ് യെദ്യൂരപ്പയുടെ പൊളിറ്റിക്കല്‍ സെക്രട്ടറിയായി സന്തോഷ് നിയമിതനാകുന്നത്. ഓപ്പറേഷന്‍ കമലയില്‍ പ്രധാന പങ്കുവഹിച്ചത് സന്തോഷായിരുന്നു.
