അടൂര് : അടൂര് ബൈപ്പാസിലെ വട്ടത്തറപ്പടിയില് കൊടുംവളവില് വാഹനങ്ങളെ മറികടക്കാതിരിക്കുവാനുള്ള റോഡിലെ മഞ്ഞ വരകള് മാഞ്ഞത് അപകടഭീഷണിയുയര്ത്തുന്നു. അമിത വേഗതയിലാണ് ഇതുവഴി വാഹനങ്ങള് കടന്നുപോകുന്നത്. തിരക്കേറിയ ബൈപ്പാസ് റോസില് മഞ്ഞ വരകള് മഞ്ഞുപോയത് മൂലം ഡ്രൈവര്മാര്ക്ക് അപകടം തിരിച്ചറിയുവാനും കഴിയുന്നില്ല. റോഡിലെ സീബ്ര ലൈനുകളും മാഞ്ഞുപോയിട്ടുണ്ട്. രാത്രി സമയങ്ങളിലാണ് ഇത് ഏറ്റവും കൂടുതല് അപകടക്കെണിയായി മാറുന്നത്. ഭാരം കയറ്റിയ ചരക്കുവാഹനങ്ങള് ഉള്പ്പെടെ പതിവായി സഞ്ചരിക്കുന്ന റോഡില് മഞ്ഞ വരകള് ഇല്ലാത്തതിനാല് വലിയ വാഹനങ്ങളെ മറികടന്നാണ് കാറുകള് ഉള്പ്പെടെ സഞ്ചരിക്കുന്നത്.
അടൂര് ബൈപ്പാസ് റോഡിന്റെ ഭാഗമായ വടക്കടത്ത്കാവില് ഉള്പ്പെടെ നിരവധി വാഹനാപകടങ്ങളാണ് നടക്കുന്നത്. അടൂര് നഗരത്തിലെ ഗതാഗതക്കുരുക്ക് ഒഴിവാക്കുന്നതിന്റെ ഭാഗമായാണ് ബൈപ്പാസ് റോഡ് നിര്മ്മിച്ചത്. ദിവസവും നൂറുകണക്കിന് വാഹനങ്ങള് കടന്നുപോകുന്ന റോഡില് മഞ്ഞവരകള്ക്ക് ഒപ്പം സീബ്ര ലൈനുകളും പെഡസ്റ്റല് ക്രോസിംഗ് ലൈനുകളും പലയിടത്തായി മാഞ്ഞുതുടങ്ങിയിട്ടുണ്ട്. സ്കൂള് വാഹനങ്ങള് ഉള്പ്പെടെ സഞ്ചരിക്കുന്ന റോഡില് ഇത് വലിയ സുരക്ഷാ ഭീഷണിയാണ് ഉയര്ത്തുന്നത്. റോഡില് സുരക്ഷ ഒരുക്കുവാന് ബന്ധപ്പെട്ട അധികൃതര് അടിയന്തിര നടപടി സ്വീകരിക്കണം എന്നാണ് യാത്രക്കാരുടെ ആവശ്യം.
