തിരുവല്ല: കോളേജ് വിദ്യാര്ഥിനിയുടെ മാല പൊട്ടിച്ച് കടന്ന യുവാവ് അറസ്റ്റില്. വളളംകുളം രജി ഭവനില് സുജിത്ത് ചന്ദ്രന് (39) ആണ് പിടിയിലായത്. കുറ്റപ്പുഴ സ്വദേശിനിയായ കോളേജ് വിദ്യാര്ത്ഥിനിയുടെ 10 ഗ്രാം തൂക്കം വരുന്ന സ്വര്ണ മാല പൊട്ടിച്ചു സ്കൂട്ടറില് കടന്ന കേസിലാണ് അറസ്റ്റ്. വഴിയാത്രക്കാരായ സ്ത്രീകളെ കയറിപ്പിടിച്ചതടക്കം ഒട്ടനവധി ക്രിമിനല് കേസുകളില് പ്രതിയാണ് ഇയാള്.
സിസിടിവിയും മൊബൈല് നമ്പറും കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. തിങ്കളാഴ്ച രാവിലെ തിരുവല്ല റെയില്വേ സ്റ്റേഷന് മുമ്പിലായിരുന്നു കേസിനാസ്പദമായ സംഭവം നടന്നത്. റെയില്വേ സ്റ്റേഷന് മുമ്പിലെ എ.ടി.എം കൗണ്ടറില് നിന്നും പണമെടുക്കാനായി ഓട്ടോറിക്ഷയില് നിന്നും ഇറങ്ങിയ പെണ്കുട്ടിയുടെ കഴുത്തില് കിടന്നിരുന്ന മാല പൊട്ടിച്ചെടുത്ത ശേഷം സുജിത്ത് സ്കൂട്ടറില് രക്ഷപ്പെടുകയായിരുന്നു.
മോഷ്ടിച്ച മാല ചെങ്ങന്നൂരിലെ സ്വകാര്യ പണമിടപാട് സ്ഥാപനത്തില് ഇയാള് പണയം വെച്ചിരുന്നു. ഇവിടെ നിന്നും മാല പോലീസ് കണ്ടെടുത്തു. ഡിവൈ.എസ്.പി ടി. രാജപ്പന്റെ നിര്ദ്ദേശ പ്രകാരം പ്രിന്സിപ്പല് എസ്.ഐ അനീഷ് ഏബ്രഹാം, എസ് .ഐ സന്തോഷ്, സിനിയര് സി പി ഒമാരായ കെ ആര് ജയയുമാര് പ്രബോധ് ചന്ദ്രന്, സജീവ്, മാത്യു പി. ജോണ് എന്നിവരടങ്ങുന്ന സംഘമാണ് പ്രതിയെ പിടികൂടിയത്.
