മലപ്പുറം: മലപ്പുറം ജില്ലയില്‍ പോലീസിന്റെ ലഹരി മരുന്ന് വേട്ട തുടരുക ആണ്. ശനിയാഴ്ച പെരിന്തല്‍മണ്ണ പോലീസ് ആണ് എം ഡി എം എയുമായി യുവാവിനെ പിടികൂടിയത്. 20 ഗ്രാം എംഡിഎംഎ യുമായി പാങ്ങ് ചേണ്ടി സ്വദേശി തൈരനില്‍ അബ്ദുള്‍വാഹിദിനെ (29)യാണ് അറസ്റ്റ് ചെയ്തത്. ജില്ലയില്‍ യുവാക്കള്‍ക്കിടയില്‍ സിന്തറ്റിക് മയക്കുമരുന്നുകളുടെ ഉപയോഗം വര്‍ധിക്കുന്നതായി വിവരം ലഭിച്ചതിനെ തുടര്‍ന്ന് പോലീസ് ഈ മേഖലയില്‍ അന്വേഷണം ഊര്‍ജിതമാക്കിയിരുന്നു.
ബെംഗളൂരുവില്‍ നിന്നും ഏജന്‍റുമാര്‍ മുഖേന എം ഡി എം എ നാട്ടിലെത്തിച്ചാണ് യുവാക്കള്‍ക്കിടയില്‍ വില്‍പ്പന നടത്തുന്നത്. ഈ സംഘത്തില്‍ പെട്ട ചിലര്‍ കഴിഞ്ഞദിവസം പെരിന്തല്‍മണ്ണയില്‍ പോലീസിന്റെ പിടിയിലായിരുന്നു. ഇവരെ ചോദ്യം ചെയ്തതില്‍ പെരിന്തല്‍മണ്ണ ,കൊളത്തൂര്‍ ടൗണുകളിലും പരിസരങ്ങളിലും കേന്ദ്രീകരിച്ച് മയക്കുമരുന്ന് വില്‍പ്പന നടത്തുന്ന സംഘത്തിലെ കണ്ണികളെ കുറിച്ച്‌ സൂചന ലഭിച്ചത്.
തുടര്‍ന്ന് ജില്ലാപോലീസ് മേധാവി എസ്.സുജിത്ത് ദാസ് ഐപിഎസിന്‍റെ നിര്‍ദ്ദേശപ്രകാരം പെരിന്തല്‍മണ്ണ ഡിവൈഎസ്പി എം.സന്തോഷ്കുമാര്‍,സി.ഐ. സി.അലവി എന്നിവരുടെ നേതൃത്വത്തില്‍ പെരിന്തല്‍മണ്ണ എസ്.ഐ. സി.കെ.നൗഷാദുംസംഘവും പെരിന്തല്‍മണ്ണ സ്റ്റേഷന്‍ പരിധികളില്‍ നടത്തിയ വ്യാപക പരിശോധനയിലാണ് മാരകശേഷിയുള്ള എംഡിഎംഎ മയക്കുമരുന്നുമായി പെരിന്തല്‍മണ്ണ പോളിടെക്നിക്ക് കോളേജിന് സമീപം വെച്ച്‌ അബ്ദുള്‍ വാഹിദിനെ അറസ്റ്റ് ചെയ്തത്.
